13/10/2026
ℹ️ O legado do tempo
Colección de reloxos de José Antonio Puentes Romay
ℹ️Reloxo de sobremesa. Sinclair Harding & Co.
Ca. 1975-1985 (edición limitada 863/999)
Este reloxo presenta unha caixa esqueleto de estrutura rectangular formada por 4 piares cilíndricos e apoiada sobre unha base de madeira dotada de pequenas patas de soporte. O compartimento inferior destinado á recepción e retorno do tren de esferas está forrado de feltro verde para amortecer o impacto dos móbiles metálicos. A estrutura portante de latón deixa ao descuberto os compoñentes e o característico sistema de plano inclinado e rodadura superior.
Na parte superior os raís do carril helicoidal almacenan as 24 esferas de aceiro que actúan como motor ou regulador de gravidade mediante o percorrido alternativo sobre a bandexa inclinada.
A esfera é circular, con anel capitular prateado, números romanos negros para as horas e florituras intermedias. Presenta agullas de aceiro negro. Os catro parafusos visibles na esfera cumpren unha dobre función: suxeitan a esfera á maquinaria e, de forma simultánea, fixan a platina anterior aos piares cilíndricos.
Na zona inferior do círculo central da esfera disponse unha pequena placa circular aplicada coa firma do minorista, en cursiva: Dove / Bazeley / Cheltenham / ENGLAND.
Na platina posterior aparece: Sinclair Harding & Co. (England), coa inscrición central "FEMA".
Presenta unha base de madeira nobre pulida con catro patas ou soportes metálicos curtos, cuxo compartimento inferior de recepción/retorno de bólas está forrado de feltro de cor verde escura. Conta cunha placa de latón dourado coa inscrición: Spherical Weight Clock / Nº 863 / 999, referida á edición limitada.
Para o seu funcionamento, unha esfera situada na parte superior percorre a pista inclinada dun lado a outro. Deslízase por ese plano por efecto da gravidade. Ao chegar ao extremo da bandexa, o seu peso provoca a inversión da pendente da pista. Isto fai que a bandexa bascule, é dicir, que o extremo que estaba alto baixe e o que estaba baixo suba. Ese movemento de basculación é o que empurra un dente de escape ou libera momentaneamente o tren de engrenaxes, permitindo que as agullas avancen un intervalo preciso de tempo antes de que a bola rode en dirección contraria (ou se complete o ciclo do tren de esferas).
Libérase una bóla cara a bandexa da base (forrada de feltro verde para amortecer o impacto) cada 1,5 horas aproximadamente.
Sinclair Harding & Co. é un fabricante inglés moderno de reloxos de alta calidade, especialmente coñecido polos reloxos de precisión e pezas de inspiración clásica. Non estamos ante unha peza antiga do XIX, senón máis ben ante un reloxo de alta reloxería moderna inspirado nos conceptos cinemáticos de Sir William Congreve e na microenxeñería de finais do século XX.
Dove Bazeley (e a súa denominación estreitamente vinculada, Harding & Bazeley) foi unha célebre firma de microenxeñería e alta reloxería con sede en Cheltenham, Gloucestershire (Inglaterra). Concibiu a patente cinemática e o deseño do prototipo, mentres que Sinclair Harding & Co. realizou o mecanizado de precisión das platinas e tren e FEMA (G. & F. Molyneux) asumiu o acabado, o dourado de compoñentes e a distribución comercial para a serie The Heritage Collection.
Durante o último terzo do século XX, especialmente entre as décadas de 1970 e 1990, o taller converteuse nun referente de culto para a recreación de mecanismos de exhibición histórica e reloxos de fantasía e misterio, non producía reloxos convencionais de parede ou peto, senón mecanismos de exhibición cinemática, concibidos para ser observados en funcionamento.
Para producir pezas mecánicas dun nivel irreprochable, Bazeley estruturou unha trama colaborativa co mellor da horoloxía británica:
- Sinclair Harding & Co.: Encargados da fabricación do movemento principal e do mecanizado de precisión das platinas.
- FEMA (G. & F. Molyneux): Distribuidores comerciais e especialistas en acabados de latón y caixas.
- The Heritage Collection: Serie comercial de luxo concibida para coleccionistas internacionais baixo a cal se comercializaron modelos icónicos como o Spherical Weight Clock (o reloxo de pesos esféricos) ou o Perpetuum Clock.
