15/10/2025
Hoxe, 15 de outubro de 2025, péchanse as portas dun anaco de historia de Lugo: a Galería Sargadelos.
Dende 1990, este espazo foi moito máis ca unha tenda de cerámica. Foi un punto de encontro para a arte, a cultura e a vida da cidade.
Aquí celebráronse exposicións, presentacións de libros, recitais e charlas… pero, sobre todo, compartíronse ilusións, amizade e amor polo noso.
Nada disto sería posible sen Xesús Pérez Regueiro, “Quico”, a alma deste lugar. Durante décadas, Quico converteu esta galería nun faro cultural para Lugo, un espazo aberto onde sempre había sitio para a arte, a palabra e a xente con ganas de crear.
Dende que el nos deixou hai dous anos, nada volveu ser igual. Pero a súa pegada segue viva en cada recuncho, en cada exposición, en cada conversa que algunha vez encheu estas paredes.
Hoxe, ao pechar a reixa por última vez, queremos dar as grazas de corazón a todas as persoas que pasastes para despedirvos, deixar unha aperta, unha lembranza ou un desexo de sorte.
Grazas tamén a todos eses clientes de tantos anos, que co tempo se foron convertendo en amigos. 💙
Emociónanos ver canto significou este lugar para tantas persoas.
Grazas, Quico, por tanto.
Grazas, Lugo, por acompañarnos neste camiño.
Aínda que a galería peche, o espírito que naceu aquí seguirá vivo en cada lembranza, en cada obra e en cada persoa que creu na cultura local.
Como el sempre dicía:
“Co pracer da vosa compaña, para todos vós, unha aperta longa, fonda, forte, tensa e duradeira.”
Ata sempre 💙
