Baroniet Rosendal

24/04/2026

Baroniet Rosendal har no vorte ein del av De Historiske, eit nettverk av nokre av dei mest særeigne historiske overnattings- og serveringsstadene i Noreg. Dette markerer eit viktig steg i vidareutviklinga av tilbodet ved Baroniet, og opnar dørene for eit breiare publikum.
Som ein del av satsinga vil Baroniet Rosendal no starte opp med middagstilbod i restauranten på Avlsgarden, ikkje berre for tilreisande gjester, men òg for kvinnheringane og andre besøkande som ønskjer ei god matoppleving i historiske omgjevnader.
Frå 2. mai vil restauranten servera satt 3- rettars middag kvar fredag og laurdag klokka 19.00. Frå og med 22. juni vert det dagleg ope tilbod. Menyane er basert på sesongens råvarer frå kjøken- og urtehagen i Rosendal Hage. Vi samarbeider med lokale produsentar som leverer kortreiste råvarer og produkt.Ynskjer du å bestille bord, ta kontakt på mail: [email protected]

20/04/2026

Hjartans takk til kvar og ein!
Forrige veke vart det gjennomført dugnad i Rosendal Have. Først ute var 5. - 7. klasse ved Malmanger skule som gjorde ein flott innsats bl.a. med å raka Alsbråtet. Same kveld vart det sett rekord på den årlege dugnaden, over 80 flotte vener av Baroniet stilte opp og gjorde ein fantastisk innsats med klargjering av hagen til sesongstart. Vi vonar at sesongkorta vert flittig nytta, velkomne!
Vi er takksame for all god hjelp!

07/04/2026

Velkommen på Dugnad! ☀️🍃

24/03/2026

Sjå heile kulturprogrammet her: https://www.baroniet.no/kulturprogram/

Velkomen til Baroniet Rosendal! Til slottet frå 1665; mellom fjord, fonn, fjell og fossefall.
Til fortida i notida. Til eventyret i verkelegheita. Opplev gjestfriheit, ro og unike natur- og kulturopplevingar på Noregs einaste baroni.

14/03/2026

Overnatt på Hotell Avlsgården Baroniet Rosendal 🌸🛏️ Velkommen med booking på booking.baroniet.no

06/03/2026

Rosendal Kammermusikkfestival vart etablert i 2016 og har sidan den gong etablert seg som ein av dei viktigaste klassiske festivalane i Noreg. Festivalen har vore leia av Leif Ove Andsnes i samarbeid med Baroniet Rosendal, og har trekt både nasjonale og internasjonale utøvarar og eit dedikert publikum.
I august 2025 gjekk den tiande og siste Rosendal Kammermusikkfestival av stabelen. Samarbeidet med Leif Ove Andsnes held likevel fram. Frå og med 2026 vil han vere kunstnarisk rådgjevar for ein ny klassisk konsertserie, Klassisk helg, ved Baroniet Rosendal.
Konsertserien skal ta vare på den musikalske arven frå festivalen, men i ein ny og meir konsentrert form – to helgar i sommarhalvåret, med høgt kunstnarisk nivå og ei tydeleg tematisk ramme.
2. og 3. mai , opningshelga, er dei to første konsertane, og 14.-16. august er det klart for dei fire neste. Billettane ligg klare, og du finn dei her: www.baroniet.no/kulturprogram

27/02/2026

Frøken Julie av August Strindberg
Ein samproduksjon av Den Nationale Scene i Bergen og Baroniet Rosendal
22.-30. August

AUGUST STRINDBERG sitt ikoniske stykke FRØKEN JULIE frå 1888 er i denne versjonen lagt til BARONIET ROSENDAL.
Strindbergs klassikar er ei rå og presis studie i korleis klasse, kjønn og begjær kan rive menneske sund. Ei intens og nådelaus historie om grenser som blir brotne og prisen som følgjer.

Regi: Svein Sturla Hungnes

Medverkande:
Susann Bugge Kambestad som Julie
Hugo Mikal Skår som Jean
Reny Gaassand Folgerø som Kristin

Førestillinga vil foregå i Borggarden på slottet og i Riddersalen på Avlsgarden.
Meir info og billettar: www.baroniet.no/kulturprogram/froken-julie

30/01/2026

«Tore Renberg og Christian Ihle Hadland: Ein kveld i regi av kunstens intelligens»

Billettar og pakkar med overnatting, framsyning og middag får du kjøpt her:
https://www.baroniet.no/kulturprogram/tore-renberg-christian-ihle-hadland-ein-kveld-i-regi-av-kunstens-intelligens/
Velkomen!

c

23/01/2026

Pærehagen på Baroniet i Rosendal var ein gong innhaldsrik og omfattande. No er det diverre ikkje like mange frukttre att. KVANN og Baroniet skal difor samarbeide om podekurs 2. mars kl 15-20. Der får du høve til å lære å pode gamle pæresortar, og du får med deg tre tre heim att. Dei overskytande trea blir donerte til Baroniet, slik at dei kan starte arbeidet med å re-etablere pærehagen.

Kurset gir grunnleggande informasjon om kva poding er, ulike teknikkar, om naudsynt utstyr, metodikk, teoretisk kunnskap og praktisk trening. I tillegg til at du får med deg tre av trea du lagar, får du og med deg eit grundig kompendium om poding og høve til å kjøpe podekniv og anna utstyr. På dette kurset vil vi nytte sortar som keiserinne, raud haustbergamott og skånsk sukkerpære, med frøstammar som grunnstamme. Om du ønsker litt meir moderne sortar på små stammar (kvede) så kan du tinge det i nettbutikken og halde fram med podinga litt seinare på våren. Eple blir poda med same teknikk, så ikkje ver redd for å prøve det og!

Kurshaldar er Eirik Lillebøe Wiken. Alle påmeldte får ein mail med praktisk informasjon om kurset. I etterkant får du tilsendt eit kursbevis frå Studieforbundet Natur og Miljø.

Påmelding gjer du her: https://event.checkin.no/195597/podekurs-paere-i-rosendal

16/01/2026

Vi kan med glede annonsera at Hotell Avlsgården Baroniet Rosendal er kvalifisert som medlem i «De historiske hotel og spisesteder».
Kvalitetsmerket «De historiske» er ifølgje organisasjonen eit løfte om ein heilt bestemt kvalitet i opplevinga for gjestene som besøker medlemene. Gjennom snart 20 år har gruppa utvikla ein kvalitetsstandard der historisk ramme, vertskapsrolla og autentiske opplevingar står sentralt.
Vi tenkjer at Avlsgarden og Fruehuset passar godt inn i denne familien, og gler oss til samarbeidet.
Online booking kjem på plass om kort tid, men førebels kan de kontakta oss på e-post: [email protected] for booking 🤩 Velkomen!