03/09/2026
En 1945, a editorial Correo Literario de Bos Aires, que toma o seu nome do xornal fundado por Arturo Cuadrado, Lorenzo Varela e Luis Seoane dous anos antes, publica unha antoloxía de poemas de Esther de Cáceres cun debuxo na cuberta realizado polo artista galego. A autora uruguaia e o seu home, o psiquiatra Alfredo Cáceres, mantiveron un dos faladoiros máis célebres de Montevideo, e establecerían vínculos estreitos con destacadas figuras da cultura da época, como no caso dos irmáns Dieste ou do matrimonio formado por Luís e Maruja Seoane. Este ‘Retrato de Alfredo Cáceres’, incluído na mostra ‘Seoane reencontrado. Óleos 1945-1977’, é un dos poucos retratos ao óleo que, agás os dedicados á súa dona Maruja, Seoane realizou do seu círculo máis próximo, e é a primeira vez que se expón ao público na Fundación Luis Seoane.
