VELKOMEN!
30 av bygningane i klyngetunet Agatunet vart freda i samband med jordskiftet i 1938. Tunet har faste opningstider i sommarhalvåret, med omvising, kafé, utstillingar, konsertar, servering og arrangement. Resten av året ope etter avtale. Det harbudd folk her i området i over 3700 år. Det finst fornminne både i og utanfor tunet, som til dømes gravhaugar, offergroper og helleristingar. Det
eldste noverande huset i tunet er Lagmannsstova, som vart bygd kring 1220, truleg av av slekta til riddaren, riksråden og gulatingslagmannen Sigurd Brynjulvsson. I høgmellomalderen var Aga ein gard, og eit viktig maktsentrum. Lagmannsstova er den attståande delen av eit større kompleks, som var bygd som eit administrasjonsanlegg etter europeisk modell, nytta til både representasjon og som bustad. I dag er Lagmannsstova det einaste huset i sitt slag i Noreg, og ein av dei best ivaretekne sekulære mellomalderbygninger i landet. Sigurd Brynjulvsson døydde i 1303, og då vart garden delt mellom døtrene hans. Seinare har han vore delt fleire gonger til 9 bruk. På det meste budde om lag 200 innbyggjarar i og utanfor tunet. Garden har vore sentral når det gjeld fruktdyrking, handel over Hardangervidda og jaktefart til Bergen og Nord-Noreg. På det meste hadde seks jakter tilknyting til garden. Garden har hatt kapell ( rive i 1811), skule, landhandelsmann, postkontor og telegrafstasjon. Dei særeigen skifertaka er frå Sollesnes i Jondal. Ein del utmarkshus, stølen, naustrekkja og nokre husmannsplassar er framleis i godt stand. Den over 300 meter lange og 17 meter høge skredvollen oppe i lia, som vart bygd i 2000, er og eit flott syn.
