12/12/2025
Frå dei tilsette i Moster Amfi- og kyrkjehistoriske senter til alle våre følgjarar:
Tusen takk for all støtte og gode ord, i sosiale media, e-postar, telefon og menneskemøte.
Felles for alle tilbakemeldingar er at Moster Amfi- og kyrkjehistoriske senter er ein særs viktig kulturhistorisk institusjon, både lokalt, regionalt og nasjonalt. Det er vår felles nasjonalhistorie, det er vårt Moster Amfi – ditt og mitt!
Dei tilsette i Moster Amfi er ein dedikert liten gjeng på til saman 3,4 årsverk. Det betyr at alle arrangement blir utført (før, under og etter) av denne staben, i frå formidling av nasjonalhistoria, skulebesøk, konsertar, feiringar, kafédrift, marknadsføring og ordinær dagleg drift (for å nemna noko).
For å drifte må ein ha tilsette, det me kallar eit varmt vertskap. Moster Amfi er ikkje eit lag eller organisasjon som er drifta på dugnad. Det er ikkje mogleg, eller bærekraftig. Men for at det ikkje skal bli misforstått; våre dugnadskrefter er heilt uunnverleg!
«Kva skal til for at Moster Amfi skal ha ljos i vindaugo frå årsskiftet?». «Kor mykje lån er det snakk om?».
Dette er nokre av spørsmåla me har fått og som me ynskjer å svare på;
Låna Moster Amfi måtte ta opp i høve Nasjonaljubileet i 2024, er kr. 3.5 mill. Kostnaden i høve lån, samt for liten grunnfinansiering er den reelle grunnen for at Moster Amfi sitt styre har teke slutninga om å permittera dei tilsette. Ein kan ikkje drive på kassakreditt, det er uforsvarleg styring.
Moster Amfi har sjølvsagt søkt om å koma på Statsbudsjettet både for 2025 og for 2026. Diverre har Moster Amfi- og kyrkjehistoriske senter ikkje kome med. Søknad for 2027 er klar.
Den økonomiske multiplikatoreffekten for kulturinvesteringar viser til at kvar krone ein nyttar til kulturinvesteringar, gjev opp til åtte kroner tilbake. Ei investering i drift av Moster Amfi- og kyrkjehistoriske senter gjev ringverkingar som arbeidsplassar, skatteinntekter, sysselsetting av lokale menneske, auka turisme, attraktivitet i form av stad å besøke, samt stad å leve. Bulyst! Moster Amfi er difor ikkje ein kostnad, men ein lønsam investering for samfunnet.
Kan ein ikkje drifte Moster Amfi, kan ein heller ikkje nytte amfieet til små og store kulturopplevingar. Viktigast av alt; Ved å ikkje investere i Moster Amfi- og kyrkjehistoriske senter set ein formidlinga av nasjonalhistorie, verdiar og demokrati, i fare. Kunnskap som i vår tid er høgaktuell.
Moster Amfi- og kyrkjehistoriske senter formidlar ei særs viktig nasjonalhistorie, er ein heilårs kulturarena og solid motor for verdiskaping. Ein stad som gjev mykje meir tilbake, enn det tilskot utgjer.
Bømlo kommune
Vestland fylkeskommune
