17/06/2026
ဒီနေ့ လမ်းမှာ မနှစ်က ကျွန်တော်တို့ Good Mood Gallery မှာ ပြပွဲလုပ်ခဲ့တဲ့ ဆရာတစ်ယောက်နဲ့ ဆုံဖြစ်ပါတယ်။ ဆရာက ဂယ်လာရီလေး တဖြည်းဖြည်းနဲ့ အရှိန်ရလာတာကို မြင်ရလို့ ဝမ်းသာတဲ့အကြောင်း အားပေးစကား ပြောရှာပါတယ်။
စကားလက်ဆုံပြောရင်း ဆရာက ဂယ်လာရီအတွက် အားနည်းချက်တစ်ခုကို စေတနာနဲ့ ထောက်ပြပေးပါတယ်။ အဲ့ဒါကတော့ "Good Mood Gallery က ဝယ်လက် အသစ်တွေ သိပ်မရှာနိုင်သေးတာ" ဆိုတဲ့ အချက်ပါပဲ။
ဒါပေမဲ့ ဆရာက ဆက်ပြီး သူ့ရဲ့ အတွေ့အကြုံကို ခုလို မျှဝေပေးခဲ့ပါတယ်။
"မနှစ်ကငါ့ပွဲတုန်းကလည်း ပြပွဲရက်အတွင်းမှာ တစ်ကားမှ မရောင်းခဲ့ရဘူး။ ဒါပေမဲ့ ပြပွဲပြီးလို့ ၃ ပတ်လောက်အကြာမှာ ၄ ကား ရောင်းလိုက်ရတယ်..."
ဒီစကားက ကျွန်တော့်ကို အများကြီး တွေးတောစေသလို၊ အနုပညာလောကရဲ့ လက်ရှိဖြစ်လေ့ဖြစ်ထရှိတဲ့ သဘောသဘာဝကိုလည်း ကောင်းကောင်း မီးမောင်းထိုးပြနေပါတယ်။
ပုံမှန်အားဖြင့် အနုပညာပြပွဲတစ်ခုရဲ့ သက်တမ်းဟာ ၃ ရက်ကနေ ၅ ရက်အထိပဲ ကြာမြင့်တတ်တာမို့ အရမ်းတိုတောင်းလှပါတယ်။ ဒါကြောင့် ပြပွဲရက်အတွင်း အနုပညာလက်ရာတွေ မရောင်းရတဲ့အခါ ဂယ်လာရီရော အနုပညာရှင်ပါ "ဝယ်လက်မရှာနိုင်လို့လား" ဆိုပြီး စိတ်ပူတာ၊ စိတ်ဓာတ်ကျတာမျိုးတွေ ရှိတတ်ကြပါတယ်။ ဒါပေမဲ့ ပြပွဲအတွင်း မရောင်းရရုံနဲ့ မအောင်မြင်ဘူးလို့ သတ်မှတ်လို့ မရပါဘူး။
ဝယ်လက် တွေဟာ ပန်းချီကားတစ်ကားကို မြင်မြင်ချင်း ဝယ်လေ့ရှိတာထက်၊ ပြပွဲမှာ စိတ်ကြိုက်ကြည့်ရှု ခံစားပြီးနောက် အိမ်ပြန်ရောက်မှ မိမိအိမ်ရဲ့ နေရာအထားအသို၊ စိတ်ခံစားမှုတို့နဲ့ ပြန်လည်ချိန်ဆပြီးမှ စဉ်းစားဆုံးဖြတ်လေ့ ရှိကြပါတယ်။
ပြပွဲကာလတိုလေးဟာ အနုပညာရှင်နဲ့ ဝယ်လက်ကြား၊ ဂယ်လာရီနဲ့ ဝယ်လက်ကြားမှာ ဆုံမှတ်တစ်ခု ဖန်တီးပေးလိုက်တာပါ။ ပြပွဲရက်အတွင်းမှာ ဝယ်လက်တွေရဲ့ ရင်ထဲကို အနုပညာလက်ရာတွေ ရောက်ရှိသွားဖို့က အဓိက ဖြစ်ပါတယ်။
ဆရာ့အတွေ့အကြုံလိုပဲ ပြပွဲအတွင်းမှာ ဘာမှမရောင်းရပေမဲ့၊ ရက်သတ္တပတ် အနည်းငယ် အကြာမှ အိမ်ကိုလါရောက်ပြီး ဝယ်ယူတာမျိုး၊ ပြပွဲကတစ်ဆင့် အဆက်အသွယ်ရပြီး နောက်မှ ပြန်လည်ဆက်သွယ် ဝယ်ယူတာမျိုးတွေဟာ ပြပွဲရဲ့ တကယ့် အကျိုးကျေးဇူးတွေပဲ ဖြစ်ပါတယ်။
ဆရာ့ရဲ့ စေတနာစကားအတိုင်း ကျွန်တော်တို့ Good Mood Gallery အနေနဲ့ ဆက်လက် ကြိုးစားသွားရမှာ ဖြစ်သလို၊ အနုပညာရှင် ဆရာ၊ ဆရာမများအနေနဲ့လည်း မိမိတို့ရဲ့ ပြပွဲရက်တိုတိုအတွင်းမှာ အကြိတ်အနယ် မရောင်းရရုံနဲ့ စိတ်ပျက်အားငယ် စိတ်ပူစရာ မလိုပါဘူး။
ပြပွဲတစ်ခု လုပ်လိုက်ခြင်းအားဖြင့် မိမိရဲ့ လက်ရာတွေကို လူအများ သိရှိသွားခြင်း၊ မှတ်တမ်းဝင်သွားခြင်းနဲ့ ရေရှည်ဝယ်လက်တွေရဲ့ စိတ်ထဲမှာ နေရာယူလိုက်နိုင်ခြင်းကတင် ထာဝရ တည်တံ့မယ့် အကျိုးကျေးဇူးတွေပဲ ဖြစ်ပါတယ်။
ဂယ်လာရီအတွက် အားနည်းချက်ကိုလည်း ထောက်ပြ၊ အတွေ့အကြုံကောင်းတွေကိုလည်း စေတနာရှေ့ထား မျှဝေပေးခဲ့တဲ့ ဆရာ့ကို အထူးပဲ ကျေးဇူးတင်ရှိပါတယ်ခင်ဗျာ။
Good Mood Gallery
