17/09/2026
மருத நிலம் உருவான வரலாறு :
தமிழர்களின் வாழ்வியலில் திணைக் கோட்பாடு மிகவும் முக்கியமானது. குறிஞ்சி, முல்லை, மருதம், நெய்தல், பாலை என்பன பற்றி இலக்கணங்கள் இயம்புகின்றன. ஐந்திணை என்பது மனித குல வரலாற்று வளர்ச்சியில் சமகாலத்தில் ஒரே நேரத்தில் உருவாகி இருக்கவே முடியாது. மனிதர்களின் வளர்ச்சி என்பது மனிதக்குரங்கிலிருந்து படிப்படியாக வளர்ந்த நிலை தான். உழைப்பும் தேவையும் தான் மனித குல வளர்ச்சிக்கான அடிப்படையாக இருந்தது. காட்டுமிராண்டிகளாக இருந்த மனித இனத்தின் மூதாதையர்கள், படிப்படியாக வளர்ச்சி பெற்று நிலைச் சமூகமாக மாற்றம் பெறுகின்றனர்.
குடும்பம், தனிச் சொத்து, அரசு ஆகியவற்றின் தோற்றம் நூலில் மனித குல வளர்ச்சி குறித்து எங்கெல்ஸ் விளக்குகிறார். விலங்காண்டிகளாக இருந்த மனித குலம் படிப்படியாக எப்படி வளர்ச்சி பெற்றது என்பதை விளக்கி இருப்பார். இயற்கையில் விளைந்த காய்கனிகளை உண்டும், வேட்டையாடியும் தான் மனித குலம் தன்னுடைய அடியை எடுத்து வைக்கிறது. சமூகத் தேவை அதிகரிக்க அதிகரிக்க உழைப்பின் மூலம் பொருள் உற்பத்தி முறையில் ஒரு மாற்றம் நிகழ்கிறது. அது ஒரு புதிய சமூகத்தை உருவாக்குகிறது. மனித சமூகம் பொருள் உற்பத்தியில் தன்னை ஈடுபடுத்திக் கொண்டு வளர்ந்து கொண்டே வருகிறது.
தமிழகச் சூழலில் குறிஞ்சியும் முல்லையும் நெய்தலும் தான் இயற்கையாக உருவான நிலங்கள். மலையும், காடும், கடலும் தானே இயற்கையாக உருவாயிருக்க முடியும். குறிஞ்சியும், முல்லையும், நெய்தலும் இயற்கையாகத் தோன்றின. பருவ கால மாறுபாட்டால் முல்லையும் குறிஞ்சியும் முறைமையிற் திரிந்து பாலை ஆயின. பாலை என்பது தனி நிலம் கிடையாது. வளம் குன்றிய காலத்தின் குறிஞ்சி முல்லை பகுதிகள் தான் பாலை.
ஆனால் மருதம் என்பது இயற்கையாக உருவான நிலம் கிடையாது. அது செயற்கையாக உருவாக்கப்பட்டது. விளை நிலங்கள் என்பன செயற்கையாக உருவாக்கப்படுபவை தானே. காடு அழித்து நாடாக்குதல் என்பதுதான் மாந்த நிலை வளர்ச்சி. எனில் காட்டை அழித்து யார்? நாடாக்கியது யார்? மருதத்தை உருவாக்கியது யார்?
காடுகளை அழித்து வேளாண் வளர்ச்சியை முன்னெடுத்தவர்கள் யாராக இருக்க முடியும்? மருதமே உருவாகவில்லை. எனில் மருத நிலத்தில் பிற்காலத்தில் வாழ்ந்தவர்கள் யாராக இருக்க முடியும்? குறிஞ்சி,முல்லை நில மக்கள் மட்டுமே மருதத்தை படைத்திருக்க முடியும். பெருகி வரும் தேவைக்காகவும், வளர்ந்து வரும் மாந்த குல வளர்ச்சிக்காகவும் பொருள் உற்பத்தியை அதிகப்படுத்த வேண்டிய தேவை மனித குலத்திற்கு ஏற்பட்டது. ஆகவே காடுகளில் வாழ்ந்த இயற்கையில் விளைந்த காய்கனிகளை உண்டு வேட்டையாடிய மனிதன் அதாவது குறிஞ்சி,முல்லை நில மனிதன், காடுகளை அழித்து வேளாண் நிலங்களை உருவாக்குகிறான். மருத நிலத்தை உருவாக்குகிறான். மருத நிலம் என்பதே செயற்கையாக உருவாக்கப்பட்டது தான். இது தமிழகத்திற்கு மட்டுமல்ல உலகு தழுவிய பொதுவான மாந்த குல வளர்ச்சி நிலை இதுதான்.
காவிரி டெல்டாவாக இருந்தாலும் சரி, கங்கை டெல்டாவாக இருந்தாலும் சரி, இந்தப் பகுதிகள் எல்லாம் ஒரு காலத்தில் காடுகள் சூழ்ந்த பகுதியாகத் தான் இருந்தன. அதாவது முல்லை நிலமாக விளங்கின. அந்த முல்லை நிலத்தை, காடுகளை அழித்து தான் மருதம் உருவாக்கப்பட்டது. இவர்களால்தான் வேளாண் நாகரீகம் வளர்ந்தது. அதை வளர்த்தவர்கள் குறிஞ்சி முல்லை நில மக்கள். முல்லை நிலத்தில் வாழ்ந்த குடிகள்.
இப்படியாக முல்லை நில மக்கள் மருதத்தின் வேளாண் குடிகளாக மாற்றம் பெறுகின்றனர். குறிஞ்சி,முல்லை நில போர் மறவர்கள் மருதத்தின் வேந்தர்களாக, படை வீரர்களாக உருவெடுக்கிறார்கள்.
இந்த நிலங்களில் வேளாண் தொழிலில் உடல் உழைப்பில் ஈடுபட்ட ஒரு பெரும் சமூகக் கூட்டம் தான் உழவர்களாக மாறினர். இந்த உழைக்கும் மக்களை வேளாண் தொழிலில் ஈடுபடுத்தி தான் உபரியைத் திரட்டினர். அரசு வலுவாக தன்னை நிலைநிறுத்திக் கொண்டது. இந்த காலகட்டத்தில் தான் கலை இலக்கியங்கள் வளர்ந்தன. அறிவுசார் சமூகம் உருவானது. அடிமைச் சமூகம் தோற்றம் பெற்றது.
மனித குல வரலாற்று வளர்ச்சி கட்டத்தில் மருத நில நாகரிகம் உருவாவதற்கு முன்பே, மனித குலத்திற்கு நீண்ட வரலாறு உண்டு. மருத நில நாகரீகம் என்பது தமிழர் வரலாற்றில் மட்டுமல்ல, உலக மாந்த குல வளர்ச்சி வரலாற்றிலும் மிக மிகப் பிந்தையது. முதலில் இந்த சமூக வளர்ச்சிப் போக்கைப் புரிந்து கொள்ள வேண்டும்.
ஐவகை நிலங்களையும், ஐந்திணை கோட்பாடுகளையும் புறத்திணைக் குறிப்புகளையும் கொண்டு தமிழர் வரலாற்றை ஒரு மீளாய்வுக்கு உட்படுத்துவோம்...
தோழமையுடன்
மருது பாண்டியன்
சோசலிச மையம்
6379240290
மீள்பதிவு
