திருவண்ணாமலை மாவட்ட வரலாற்று ஆய்வு நடுவம்

06/09/2026

மார்கழிக் கொண்டாட்டம்
தொல்லியல் திருவிழா 2026
திருவண்ணாமலை | டிசம்பர் 19, 20 (சனி, ஞாயிற்றுக்கிழமை)
வரலாறு | தொல்லியல் | கலை

புகழ்பெற்ற திருவண்ணாமலையில், நாடெங்கிலும் இருந்து வரலாற்று அறிஞர்கள், தொல்லியல் ஆய்வாளர்கள், கள ஆய்வாளர்கள், ஆர்வலர்கள், மாணவர்கள், பொதுமக்கள் ஒன்றுகூடும் தனிச்சிறப்பானத் தொல்லியல் நிகழ்வு ஒன்று நடைபெறவுள்ளது.

வரலாற்றையும் தொல்லியலையும் நூல்களுக்குள்ளும் அரங்கங்களுக்குள்ளும் மட்டும் நிறுத்தாமல் — கலையாகவும், காட்சியாகவும், கலந்துரையாடலாகவும், ஒட்டுமொத்தமாக ஒரு கொண்டாட்டமாகவும் மக்களிடம் கொண்டு சேர்க்கும் இம்முயற்சியை ஒவ்வொரு வருடமும் நடத்த திருவண்ணாமலை மாவட்ட வரலாற்று ஆய்வு நடுவம் முன்னெடுக்கிறது.

அதன்படி இந்த மார்கழித் திருவிழா, “தொல்லியல் திருவிழா 2026” என்ற பெயரில் எதிர்வரும் 2026 டிசம்பர் 19, 20 (சனி மற்றும் ஞாயிறு) ஆகிய இரு நாள்களில், திருவண்ணாமலை புகழ்பெற்ற மலைசுற்றும் பாதையுலுள்ள, வேடியப்பனூர் அருணாச்சலா கிராமப்பள்ளியில் நடைபெறும்.

நிகழ்வுகள்
1. தொல்லியல் கண்காட்சி
2. புகைப்படக் கண்காட்சி
3. புத்தகக் கண்காட்சி
4. அறக்கட்டளைச் சொற்பொழிவுகள்
5. கோயிற்கலைப் பயிற்சி
6. புத்தக வெளியீட்டு விழா
7. அறிவுசார் பயிலரங்குகள்
8. மரபு நடை
9. ஆவணப்பட வெளியீடு
10. கருத்தரங்க நூல் வெளியீடு

உள்ளிட்ட பல நிகழ்ச்சிகள் இரு நாள்களிலும் இடம்பெறும்.வரலாற்றின் மீதும் மண்ணின் மரபின் மீதும் ஆர்வம் கொண்ட அனைவரையும் இக்கொண்டாட்டத்திற்கு இன்முகத்தோடு அன்புடன் வரவேற்கிறோம்.

மார்கழித் திருவிழா தேதிகளை இப்போதே குறித்துக் கொள்ளுங்கள்! விழா நிகழ்வுகள் ஒவ்வொன்றைப் பற்றிய விரிவான விவரங்கள் பின்னர் வெளியிடப்படும்.

ச. பாலமுருகன்
செயலாளர்
திருவண்ணாமலை மாவட்ட வரலாற்று ஆய்வு நடுவம்
9047578421

16/06/2026

திருவண்ணாமலை மாவட்ட வரலாற்று ஆய்வு நடுவம் நடத்தும் 27 வது மரபு நடை

தகடூர் யாத்திரை

தமிழக வரலாற்றில் தனித்துவமான நிலவியலில் இருந்து மூழ்கித்த வரலாற்றின் சுவடுகளைக் காணவும் அம்மண்ணில் தோன்றிய
வேளிர்கள், நாடாள்பவர்கள், மண்ணுக்காக இன்னுயிர் தந்தவர்களான வரலாற்று மாந்தர்களையும் இயற்கை அளித்த கொடையான மலைகளும், புனல்பொன்னி என்றும் காவேரியையும் அதன் அருவியையும் காண நல்லதொரு வாய்ப்பு.


இன்னும் ஒரு சில இருக்கைகளே உள்ளன. வர விழைபவர்கள் உடன் பதிவு செய்யலாம்..

நன்றி.
வருகைக்கு இன்றே பதிவு செய்க.
குகூள் படிவம் இணைப்பு
https://forms.gle/sERyLZZX5o6CsNtf9
தொடர்புக்கு
9080480924

04/06/2026

04/06/2026

தென்கரை கோட்டை - தமிழ்நாட்டில் மிச்சமிருக்கும் தரை கோட்டைகளில் ஒன்று . தருமபுரி மாவட்டம் பாப்பிரெட்டிப்பட்டி வட்டத்தில் தென்கரைக்கோட்டை அமைந்துள்ளது.

ஜலகண்டேஸ்வரர் நதியின் தென்கரையில் கோட்டை அமைந்துள்ளதால் இதற்கு தென்கரை கோட்டை என பெயர் பெற்றதாக கூறப்படுகிறது. இது கிபி 16-ம் நூற்றாண்டில் கிருஷ்ண தேவராயரால் சுமார் 40 ஏக்கரில் கோட்டை கட்டபட்டதாக நம்பபடுகிறது. 1652-ம் ஆண்டு பிஜப்பூர் சுல்தான் வசமும் , 1968-ல் ஹைதர் அலியின் ஆட்சிக்கு உட்பட்டும் திப்பு, மன்ரோ காலத்தில் முக்கிய நகரமாகவும் திகழ்ந்தது.

கோட்டை மண்ணால் அமைக்கப்பட்ட பிரமாண்ட மதில் சுவரை அரணாகக் கொண்டது. கோட்டையை சுற்றி சுமார் 15 அடி ஆழ அகழி உள்ளது. கோட்டையின் உள்ளே மிகப்பெரிய குளம், ஓய்வறை, யானை, குதிரைகளின் லாயங்கள் உள்ளன. தற்போது இந்த லாயங்கள் இடிந்து விழும் நிலையில் உள்ளன. தர்பார் அரண்மனை, 50 அடி உயரம், 75 அடி நீளம், 30 அடி அகலம் கொண்ட தானிய சேமிப்புக் கிடங்கு உள்ளது.

குறுநில மன்னர் சீலப்ப நாயக்கர் சுற்றுப்பயணம் மேற்கொண்டபோது ஜலகண் டேஸ்வரர் ஆற்றின் அருகே ஓய்வு எடுத்துள்ளார். அப்போது சீலப்ப நாயக்கரின் கனவில் திருமண கோலத்தில் ராமர் சீதையுடன் காட்சி அளித்ததால், அவர் தென்கரைக்கோட்டை பகுதியில் கல்யாண ராமர் நிறுவியதாக ஸ்தல வரலாறு கூறுகிறது.

கோட்டை வளாகத்தில் கல்யாண ராமர் கோயிலும் அதன் வடப்புறத்தில் நஞ்சுண்டேஸ்வரர் ஆலயம், அம்மன் சன்னதி, ஆஞ்சநேயர், முருகர் சன்னதிகள் உள்ளன. கல்யாண ராமர் கோவில் முன் மண்டப சிற்பங்கள், சடைப்பெண்கள் வேலைப்பாடு மிக்கவை.

திருவண்ணாமலை மாவட்ட வரலாற்று ஆய்வு நடுவம் நடத்தும் தகடூர் யாத்திரையில் இவ்விடத்தை காண - https://forms.gle/PB1cVkQM3ew3Dg8r7

23/05/2026

திருவண்ணாமலை மாவட்ட வரலாற்று ஆய்வு நடுவம் நடத்தும் 27 ஆவது மரபு நடை

தகடூர் யாத்திரை

நாள்- ஜுன் 27,28 2026, சனி, ஞாயிறு

தமிழ்நாட்டின் தனித்துவமான வரலாற்றுப் பின்னணியும் நிலவியலும் தொல் தடங்களும் கொண்ட சங்க கால தகடூர் (தருமபுரி) பகுதியில் இரண்டு நாள் மரபு கொண்டாட்டமாக ஒரு மரபு நடை

மேலதிக தகவல்கள் விரைவில்...

தொடர்புக்கு
9080480924

05/02/2026

கல்வராயன் மலை

தமிழகத்தில் ஒரு பகுதி இந்தியா சுதந்திரம் பெற்ற பின்பும் முப்பது ஆண்டுகள் கழித்து சுதந்திரம் பெற்ற இடம் ஒன்று உண்டு. அது கல்வராயன் மலை தான். நிலவியல் அடிப்படையில் கொங்கு நாட்டையும், நடு நாட்டையும் பிரிக்கும் முக்கிய கண்ணி. இதன் பொருட்டோ என்னவோ இங்கு மகேந்திரர் காலத்திய நடுகல்லும், சோழர் கால செக்கும், கோவிலும் உள்ளன.

கிருஷ்ண தேவராயரின் படைத்தளபதியாக இருந்த கல்வராயனின் வீரத்தை போற்றி கிருஷ்ண தேவராயர் அவருக்கு இந்த நிலப்பகுதியை தானமாக வழங்கியதாகவும், அதன் பொருட்டே இம்மலைக்கு கல்வராயன் மலை என பெயர் வந்ததாகவும் ஒரு கூற்று உண்டு.

விஜயநகர ஆட்சிக்காலத்தில் இம்மலை பாளையங்களாக பிரிக்கப்பட்டு இருந்ததாக தகவல் உண்டு. அதன்பின் ஆற்காடு நவாப் ஆட்சிக் காலத்தில் அரியக்கவுண்டன் ஜாகீர் என்பவருக்கு நவாப்பால் இம்மலை முழுவதும் உரிமை வழங்கப்பட்டுள்ளது. இவர் ஆர்க்காடு நவாபிடம் ராணுவத்தில் வேலை செய்தவர். இவரின் சிறப்பான சேவைக்காக அரியக்கவுண்டனுக்குக் கல்வராயன்மலை ஜாகீர் உரிமை நவாப்பால் வழங்கப்பட்டது. அதன்பின் படிப்படியாக மேலும் 4 ஜாகீர்கள் உறவின்முறை காரணமாகவும், ஊழியத்தின் காரணமாகவும் ஏற்படுத்தப்பட்டன.

ஆங்கிலேயர் ஆட்சிக் காலத்தில் ஆங்கிலேயருக்குச் சாதகமாக நடக்க ஒப்புக் கொண்டதால் ஐந்து ஜாகீர்களுக்கும் இம்மலைப்பகுதி அவர்களின் தனிப்பட்ட சொத்துக்களாக ஆங்கிலேயர்களால் பட்டயங்கள் வழங்கப்பட்டன. இம்மலைவாழ் மக்கள் ஜாகீர்தார்களுக்குக் கொத்தடிமைகளாக இருந்து வந்தனர்.

1947இல் இந்தியா விடுதலை பெற்றாலும் இந்த மலைவாழ் மக்களுக்கு அந்த நாள் விடுதலை நாளாக அமையவில்லை. சுதந்திர நாட்டிலும் இம்மக்கள் தொடர்ந்து ஜாகீர்தாரின் கொத்தடிமைகளாகவே இருந்து வந்தனர்.

1963 ஆம் ஆண்டு அரசு ஜாகீர்தார் ஆட்சியை இம்மலைப்பகுதியில் ஒழிக்க முயற்சி செய்தது. ஆனால் இவர்கள் அரசுக்கு இணங்காமல் நீதிமன்றத்தில் தடை உத்தரவு பெற்றனர். நீதி மன்றத்தில் தடை உத்தரவு பெற்ற ஜாகீர்தார்களுக்கு எதிராக அப்போதைய தென்னார்க்காடு மாவட்ட ஆட்சித் தலைவர் திரு. பத்மநாபன் அவர்களின் முயற்சியால் ஜாகீர்தார்கள் 14.08.1976 ஆம் ஆண்டு நீதி மன்றத்திலிருந்து எவ்வித நிபத்தனையுமின்றி வழக்கினைத் திரும்பப் பெற்றுக் கொண்டு அரசிடம் இம்மலைப் பகுதிகளைக் கொடுத்து விடுவதாக ஒப்புக் கொண்டார்கள்.

இதன்படி 25.8.1976ல் ஜாகீர்தாரர்களின் மலைப்பகுதிகளின் நிர்வாகத்தை இந்திய அரசு ஏற்றுக் கொண்டது. உண்மையில் இதுவே இவர்களின் சுதந்திர நாள். அதன் பின்பே அரசும் அரசு நிர்வாக அலுவலகங்களும் மேலே சென்றன. பின் வெள்ளிமலையைத் தலைமையாக ஒன்றியமும் ஒன்றிய அலுவகமும் 1985ல் அமைக்கப்பட்டது.

திருவண்ணாமலை வரலாற்று ஆய்வு நடுவம் நடத்தும் கல்வராயன் மலை மரபு நடையில் பங்கு பெற

https://forms.gle/EwZvwwgDjydbL6769

02/02/2026

திருவண்ணாமலை மாவட்ட வரலாற்று ஆய்வு நடுவத்தின் 26 ஆவது மரபு நடை தேதி மாற்றம்

வரும் பிப்ரவரி 2026, 21,22 சனி, ஞாயிறு ஆகிய தேதிகளில் நடத்த இருந்த நிலையில் அதிகமான திருமணம் நடக்கும் நாளாக இருப்பதால் பலரால் மரபு நடைக்கு கலந்து கொள்ள இயலவில்லை எனக் கோரியதால், மரபு நடையை ஒரு வாரம் தள்ளி நடத்த முடிவுசெய்துள்ளோம்.

நாள்: பிப் 28,மார்ச் 01, சனி, ஞாயிறு

கட்டணம் ரூ 4999/-
(Travel, Food, Luxury stay, Camp fire etc..)

தொடர்புக்கு: 9080480924, 7708673782
வருகையை உறுதி செய்ய ...

https://forms.gle/EwZvwwgDjydbL6769
சபா

10/09/2025

Reader's Review for #திரிசூல_பர்வதமலை

அன்புள்ள திரு பாலமுருகன்
நீங்களும் திரு சி. பழனிசாமி அவர்களும் எழுதிய திரிசூல பர்வத மலை புத்தகத்தை இன்று வாசித்து முடித்தேன். அருமையான ஆய்வுப் புத்தகம்.
பர்வதம், மலை இரண்டும் மலைக்கான பொதுப் பெயர்களா க இருக்க அந்த மலையின் சிறப்பு பெயர் என்ன என்ற கேள்வியுடன் தொடங்கி அதன் முழுப் பெயர் திரிசூலம பர்வதமலை என்று கல்வெட்டு இலக்கியச் சான்றுகளுடன் நிறுவியதுடன் அது நவிர மலை அல்ல நவிர மலை எங்கு உள்ளது என்பதையும் அவ்வாறே நிறுவியுள்ளது.
பாறை ஓவியங்கள், கல்பதுக்கை, கல்வெட்டுகள், இலக்கியச் சான்றுகள் என பெருங்கற்காலத்திலிருந்து தற்போது வரை அதன் வரலாற்றைத் தொகுத்து அளித்திருப்பது.
கிரிவலச் சித்தரிப்பு ஒரு மரபு நடையைப் போல நடு கற்கள், கோயில்கள், கல்வெட்டுகள், பழங்கால ஊர்ப் பெயர்கள் என்பதாக விவரித்துள்ளது.
கிரிவலத்தையும் மலையேற்றத்தையும் ஒரு பயணக் கட்டுரை போல சுவைபட சொல்லியிருப்பது
அருகே உள்ள ஊர்களையும் இரு வகை சப்த ஸ்தானங்களையும் செய்யாறு மிருகண்டா ஆறு ஆகியவற்றின் பின்புலத்தோடு அறிமுகப்படுத்தி இருப்பது.
அந்த மலையில் வாழும் உயிரினங்களையும் பறவைகளையும் அறிமுகப்படுத்தி இருப்பது. குறிப்பாக அழிந்து வரும் நிலையில் உள்ள ஒரு பறவையை (மஞ்சள் தொண்டை சின்னான்) குறிப்பிட்டு விவரித்துள்ளது .
திரிசூல மலை புராணத்தை அறிமுகப்படுத்தி சில பகுதிகளை தேர்ந்தெடுத்து கொடுத்திருப்பது .
வரைபடம், சிறப்பான அழகிய புகைப்படங்கள், முன் பின் அட்டைகளில் அழகிய ஒவியம்
என பல சிறப்புகள் கொண்டதாக விளங்குகிறது இந்த நூல்.
மேலதிகமாக என்னை வெகுவாகக் கவர்ந்தது ஒரு நாவல் போல விறுவிறுப்பாக சொல்லிச் செல்லும் நடைதான். வரலாறு, இலக்கியம், கல்வெட்டு என நிறைந்துள்ள தகவல்களைப் பத்திரிகைகளுக்கு உரிய நீட்டி முழக்கிய மொழி நடையையும் ஆய்வு நூல்களுக்கான கறாரான நடையையும் தவிர்த்து பொது வாசகர்களும் எளிதாக வாசிக்கும் வண்ணம் சுவைபடச் சொல்லி இருப்பது நூலின் சிறப்பு அம்சம்.
உங்களுக்கும் திரு சி. பழனிசாமி அவர்களுக்கும் என் வாழ்த்துகள்.
பா ராஜேந்திரன்