03/09/2026
रसिकहो, नमस्कार !
वक्ता म्हणजे आपल्या विचारांची, भावना आणि ज्ञानाची श्रोत्यांसमोर प्रभावी मांडणी करणारी व्यक्ती. वक्तृत्व म्हणजे विचारांना योग्य शब्द, आवाज, लय, भाव, तर्क आणि प्रभावी मांडणी यांच्या माध्यमातून श्रोत्यांच्या मनापर्यंत पोहोचवण्याची कला!
वक्ता हा साधक असतो; वक्तृत्व हे त्याचे साधन असते. वक्तृत्व ही सातत्यपूर्ण साधनेतून विकसित होणारी कला आहे. जो ही साधना करतो तो प्रभावी वक्ता बनतो.
"स वाग्मी भवति" वाग्मी होतो म्हणजेच तो प्रभावीपणे, स्पष्टपणे आणि सुंदर रीतीने बोलण्याची कला प्राप्त करतो. वक्तृत्व ही केवळ बोलण्याची कला नाही तर ती विचारांना शब्द, शब्दांना अर्थ आणि अर्थाला प्रभाव देणारी कला आहे. जीवनपथावर या कलेचा खूपच उपयोग वारंवार अनुभवता येतो. "अल्पाक्षररमणाय य: कथयति स खलु वाग्मी |" म्हणजेच मोजक्या शब्दात निश्चित रोचक अर्थवाही बोलणारा (सांगणारा) तोच खरा वक्ता होय!
वक्तृत्व साधना होण्यासाठी वक्तृत्व स्पर्धा आवश्यक असतात. कलांगण संगमेश्वर चौथ्या वर्षात पदार्पण करणाऱ्या आंतरशालेय वक्तृत्व स्पर्धेचे आयोजन करत आहे.
'वंदे मातरम्'या स्वातंत्र्य लढ्यातील मंत्र गीताचे १५० वे वर्ष, स्वामी विवेकानंदांचे १२५ वे स्मृती वर्ष, स्वामी श्रद्धानंदांचे स्मृती शताब्दी वर्ष, चवदार तळे सत्याग्रहाचे शताब्दी वर्ष आणि "अन्न हे पूर्णब्रह्म"मानणारा संस्कार याचे कालातीत संदर्भ अभ्यासण्यासाठी आणि इतिहास, प्रेरणा, संस्कार, कृतज्ञता, स्मृति जपत "स वाग्मी भवति!" आचरणात आणुया व संगमेश्वर तालुक्यातील सर्व माध्यमिक शाळांनी सक्रिय सहभाग घेऊन ही चळवळ यशस्वी करूयात!
*कलांगण संगमेश्वर*
