20/12/2023
დიმიტრი შევარდნაძის სახელობის ეროვნული გალერეა ბექა საყვარელიძის პერსონალურ გამოფენას უმასპინძლებს
ბექა საყვარელიძე აპოლონ ქუთათელაძის სახელობის თბილისის სახელმწიფო სამხატვრო აკადემიის სახვითი ხელოვნების ფაკულტეტის ფერწერის მიმართულების მაგისტრატურის დამთავრებიდან (2010-2016) დღემდე ამავე აკადემიის მოწვეული პედაგოგია. მხატვარი 2019 წლიდან ქალაქ დრეზდენის საერთაშორისო პლენერულ გამოფენას „კულტურა. სინქრონი“ მარიამ შაქარაშვილთან ერთად ხელმძღვანელობს, რომელიც ბექა საყვარელიძის პედაგოგმა, გერმანიაში მოღვაწე ქართველმა მხატვარმა - ალექსანდრე (ალეკო) ადამიამ - დააფუძნა.
მხატვარი მუდმივად იღებს მონაწილეობას საქართველოსა და მის ფარგლებს გარეთ გამართულ საერთაშორისო გამოფენებსა და აუქციონებზე. სულ ახლახანს მისი ორი ფერწერული ტილო, რომლებიც გამოიფინება ეროვნულ გალერეაში, გაიყიდა ჰესინკის თანამედროვე ხელოვნების აუქციონზე (Hessink's Contemporary Art Auction). მისი ნამუშევრები საქართველოს, ევროპისა და ამერიკის კერძო და საჯარო კოლექციებში ინახება.
გამოფენაზე „ვიღაცა ურევს“ წარმოდგენილია მხატვრის მიერ ბოლო წლებში სხვადასხვა ტექნიკითა და მასალით შესრულებული ნამუშევრები. დამთვალიერებელი პირველად იხილავს ტილოებს, რომლებიც ამ დრომდე მხოლოდ კერძო კოლექციონერებისთვის იყო ცნობილი და ნამუშევრებს, რომლებიც კონკრეტულად ამ გამოფენისთვის შეიქმნა. უახლოეს მომავალში ბექა საყვარელიძე ახალ გამოფენაზე სამუშაოდ ბელგიაში გაემგზავრება. გამოფენას აპრილში ბელგიასა და ბენელუქსის ქვეყნებში მოქმედი ერთადერთი ქართული გალერეა „ერისთავი“ წარმოადგენს.
გამოფენის კურატორია ელისო ჯულაყიძე.
ბექა საყვარელიძის გამოფენა 20 დეკემბერს 18:00 საათზე გაიხსნება და 2024 წლის 29 იანვრამდე გაგრძელდება.
