საქართველო და მისი დედაქალაქი თბილისი განთქმულია ღირსშესანიშნაობებით და მუზეუმებით. შეიძლება ითქვას, რომ ,,სმირნოვების მუზეუმი'' ერთადერთია თბილისის მუზეუმებს შორის სადაც ასე მრავალფეროვნად არის წარმოდგენილი გასული, XVIII-XIX საუკუნეების, ევროპის (გერმანული, ფრანგული, რუსული, იტალიური, ქართული) მხატვრული კულტურის ნიმუშები. სახლი, სადაც სმირნოვების სამმა თაობამ იცხოვრა, (ამჟამინელი გ.ტაბიძის N 20) სომეხი ვაჭრისა და მეცენტის, იაგორ თამამშევის დაკვეთით, გერმანელი არქიტექტორის ოტო სიმონსონის პროექტით, 1859 წელს იქნა აგებული. იაგორ თამამშევმა, სახლი, თბილისში, მთავარმართებლის მოადგილედ სამუშაოდ გამოგზავნილ და მის შვილიშვილ- ლიზა (ელისაბედ) თამამშევაზე დაქორწნებულ მიხეილ ნიკოლოზის ძესმირნოვს გადასცა მზითვში. მნიშვნელოვანი კულტურული მემკვიდრეობისთვის განკუთვნილ მუზეუმისთვის მცირე, ოთხოთახიან სივრცეში გვერდიგვერდაა განთავსებული ქართული ისტორიული მემკვიდრეობისა და მსოფლიოს მხატვრულ-კულტურული მემკვიდრეობის ნიმუშები. იშვიათია კოლექცია, სადაც ერთადაა თავმოყრილი ესოდენ განსხვავებული ხასიათის, მასალისა და დანიშნულების ექსპონატები.
„სმირნოვების მუზეუმი“, ძველი თბილისის სოლოლაკის უბანში, სმირნოვების სახელით ცნობილ შენობაშია განთავსებული. XIX- XX საუკუნეებში, სახლი, მის ბინადრებთან ერთად, ცნობილ ევროპელ, ქართველ და რუს საზოგადო მოღვაწეებს მასპინძლობდა, რომელთა შორისაც იყვნენ: ი.ჭავჭავაძე, დ. სარაჯიშვილი, პ.ჩაიკოვსკი, ი.აივაზოვსკი, ი,ნიკოლაძე, პ.მელიქიშვილი, ი. ჯავახიშვილი, ტ. ტაბიძე და სხვები.
სახლში ინახება XVIII-XIX სს. რუსეთისა და დასავლეთ ევროპის დეკორატიულ გამოყენებითი ხელოვნების ნიმუშები, ფერწერული ტილოები, გრაფიკული ნამუშევრები, ქანდაკებები. ფ-ქ. ვინტერჰარტერის, ი. ზანკოვსკის, ა.რემის, ფ. ბაიკოვის, ი. პაევსკის, ა. აკოფიანის, ა. ნეიმანის, პ.-დ. მიტრეიერის, ფ.კრიუგერის, თ. ჰორშელდტის, უ. ჰოგარტის და სხვათა ნამუშევრები. ფაიფურის მწარმოებელი ცნობილი ქარხნების მიერ დამზადებული ჭურჭლის ნიმუშები (ძმებ კორნილოვების, კუზნეცოვის, ლიმოჟის, გარნერის და სხვა.) უძვირფასესი ავეჯი : გამბსი, ბაუერი. მართლმადიდებლური ხატების შესანიშნავი კოლექცია.
მუზეუმის კოლექცია აღსანიშნია იშვიათი და უნიკალური გამოცემებით. ექსპოზიციაში შეხვდებით ძველ გამოცემებს ფრანგულ, იტალიურ, რუსულ, გერმანულ და ინგლისურ ენებზე. მნიშვნელოვან დოკუმენტებს, ილია ჭავჭავაძის ბარათებს, მიწერილს კოლა ერისთავისადმი, რომელიც იაგორ თამაშევის მეორე შვილიშვილზე, ეკატერინეზე გახლდათ დაქორწინებული. პიანინოს, რომელზეც, თბილისში სმირნოვების ოჯახში ვიზიტისას, უკრავდა პეტრე ჩაიკოვსკი და რუბინშტეინი. ძველი და ახალი აღთქმების გამოცემებს და ა.შ.
მუზეუმის ექსპოზიციაში განსაკუთრებულ ყურადღებას იპყრობს XIX საუკუნის პეტერბურგის, ალ.პუშკინის ეპოქის ცნობილი ქალბატონის, ალ. პუშკინის, ნ. გოგოლის, მ. ლერმონიტოვის მეგობრისა და მათი არაერთი ლექსის მუზის, (იმპერატორ ნიკოლოზ I -ის კარის, ალექსანდრა ფიოდოროვნას ფრეელინას), ალექსანდრა სმირნოვა-როსსეტის სალონის ნივთები. ეს ნივთები, მისმა შვილმა, მიხეილ ნიკოლოზს ძე სმირნოვმა ჩამოიტანა თბილისში. სმირნოვების შემდგომი ორი თაობაც რუდუნებით უვლიდა და მემკვიდრიდან მემკვიდრეს გადასცემდა ოჯახის ამ უნიკალურ კოლექციას. სმირნოვების გვარის უკანსკნელმა წარმომდგენელმა, მიხეილ გიორგის ძე სმირნოვმა და მისმა დედამ, ევგენია ფონ შლეიერმა კი, სახლიცა და მასში განთავებული ნივთები და მთელი ქონება, ქართულ სახელმწიფოსა და ქართველ ხალხს აუანდერძა.
მუზეუმში, დღესაც იგრძნობა XIX საუკუნის ეპოქის სული. რომანტიკული ატმოსფერო და ძველი თბილისის მრავალეთნიკური ბუნებისთვის დამახასიათებელი ულამაზესი კულტურების სინთეზი.
ჩვენს ორგანიზაციაში პერსონალურ მონაცემთა დაცვის კუთხით ნებისმიერ საკითხზე შეგიძლიათ მიმართოთ პერსონალურ მონაცემთა დაცვის ოფიცერს: შპს მონაცემთა დაცვის ოფიცერი. საკონტაქტო ნომერი: 555 50 51 58; მეილი: [email protected].
