13/06/2026
ليه فيه صنايعي سعره رخيص وكل الزباين بتجري عليه؟ 🤔
السؤال ده كان دايمًا شاغلني…
طول عمري كنت فاكر إن اللي بيسعر رخيص أكيد بيحط خامة قليلة، أو بيقل في الشغل...
بس الغريب إني كنت بحسب شغلي بخامة قليلة برضو، وسعري يطلع أغلى من اللي بسمعه!
كنت دايمًا شاكك...
معقولة بيزرعوا الخامات؟ 🌱
ولا بيسرقوا في عدد الأمتار؟
ولا في إيه بالظبط؟ 😕
لحد ما في مرة حصل موقف مع عميل…
الموقف ده غير تفكيري تمامًا في الناس اللي بتسعّر رخيص.
العميل ده طلبني أشتغل له شغل معين،
روحت، عملت المعاينة، رفعت المقاسات، واتكلمنا في السعر…
واللي دايمًا بيكون مربط الفرس!
لأنه تقريبًا الحاجة الوحيدة اللي العميل بيفهم فيها كويس جدًا: "هيدفع كام؟"
قلت له ساعتها السعر: 2500 جنيه
رد وقاللي: "ريحني شوية، أنا معايا سعر أقل"
قلت له بمنتهى الصراحة: "صعب، أنا أصلاً مسعّر قليل علشان أكسبك"
ومع النقاش عرفت إنه جاب صنايعي عامله المتر بـ 1800 جنيه!
طبعًا فرق السعر كبير، يخليني أسيب العميل وأقوله "روح له"
بس هو أصر إني أنا اللي أشتغل، وفعلاً نزلتله لـ 2450 جنيه
بإجمالي شغل حوالي 48 ألف جنيه.
المهم بدأنا في التصميم…
طلب تعديلات، عملتها، ومكانش عاجبه...
وبعدين بعتلي تصميم تاني وقاللي "عايزه كده"
وكان التصميم ده من عند أبو 1800!
وهنا حصلت المفاجأة الكبيرة
العميل بعتلي بالغلط ورقة عرض السعر اللي الصنايعي التاني بعتهاله.
وشفت بنفسي إن السعر الرخيص ده كان بس واجهة… لكن المكسب الحقيقي في التفاصيل!
📋 العرض كان كده:
▪️ سعر المتر: 1800 جنيه
▪️ 6 أدراج × 650 جنيه للدرج
▪️ 7 متر كونيشة × 280 جنيه للمتر
▪️ دولاب إزاز بـ1800 جنيه
▪️ كل قطعة أكسسوار فيها مكسب مش أقل من 600 جنيه
▪️ الرخام كسبان فيه 500 جنيه للمتر
والإجمالي؟ 53 ألف جنيه!
يعني الزبون لو راح له فعليًا هيدفع أكتر مني بـ 5 آلاف جنيه!
وساعتها فهمت ليه أصرّ يشتغل معايا…
الزبون مش بيقارن سعر المتر بس، هو بيحسب الإجمالي.
✅ والدرس اللي اتعلمته:
لما ييجي عميل يقولك "لقيت حد أرخص"
اسأله ببساطة:
"كام الإجمالي؟"
وفهمه، وراعيه، ومتخسرهوش بسبب رد فعل سريع أو حدة في الكلام.
💡 وآخر نقطة مهمة:
فيه ناس بتخاف تستخدم طريقة المعارض أو تجزئة السعر، ويفكروا إنها حرام...
لكن الأصل في المعاملات الحلال
وطالما بتوضح للعميل كل حاجة وهو موافق، فـ مفيش مشكلة.
بس خد بالك:
لو في عرف عندكم إن "سعر المتر شامل كل حاجة"
يبقى لو هتغير ده، لازم تعرف العميل وتاخد موافقته
لأن المعروف عُرفًا كالمشروط شرطًا.
🧠 الخلاصة:
اللي ظاهر رخيص ممكن يطلع غالي
واللي ظاهر غالي ممكن يكون هو الأوفر فعلًا!
