https://www.facebook.com/1439204552997174/

حواديت البلدان, المحلة الكبرى, El-Mahalla el-Kubra (2026)

22/02/2026

زي النهاردة (٤) رمضان
وقف نشر مجلة النذير
في عام ١٩٣٨ صدر العدد الأول من مجلة النذير، ودي كانت مجلة أسبوعية سياسية إسلامية أصدرتها جماعة الإخوان المسلمين وقتها.

في العدد الأول من المجلة حسن البنا كتب افتتاحية، وهو بصراحة كان واضح وصريح ومباشر.. إحنا في حرب مع أي زعيم أو رئيس حزب أو رئيس هيئة مش هيمشي على هوانا

في الجريدة دي كان محمد صالح بيكتب خواطر، وكان مسمي فيها هتلر بـ "الحاج هتلر"، وممكن يكون ده السبب اللي روج بعد كده إن هتلر أسلم، خاصة إن المصريين كانوا نفسهم ألمانيا تفوز على إنجلترا.

21/02/2026

زي النهاردة (٣) رمضان
صدر دستور ٢٣
واحد من أفضل الدساتير في تاريخ الدولة المصرية وكان عاوز يبني نظام برلماني يفصل بين السلطات.
عبد الخالق ثروت باشا رئيس مجلس الوزراء شكل لجنة من ٣٠ عضو علشان يعملوا الدستور

فضل الملك أحمد فؤاد الأول رافض لمقترح الدستور، يعني إيه الشعب يبقى هو مصدر السلطات، وإزاي نفصل بين السلطة التنفيذية والتشريعية والقضائية
وبعد ٨ شهور نقاش... وافق الملك

أينعم الدستور منح الملك شوية صلاحيات، وبرضه الاحتلال الإنجليزي مكنش ساكت يعني وببتدخل في كل حاجة
لكن في النهاية الدستور ده كان خطوة على الطريق الصح، لغاية ما اتلغى عام ١٩٥٢

20/02/2026

زي النهاردة (٢) رمضان
مصر سيطرت على جزيرة كريت
ودي كانت زي مكافئة كده لمحمد علي باشا بعد ما ساعد الدولة العثمانية وخلص على الثورة في اليونان

ضم جزيرة كريت للدولة المصرية مكنش له جدوى اقتصادية
الإيرادات كانت ٤ مليون قرش صاغ والمصاريف ١١ مليون
لكن محمد علي باشا كان شايف في الجزيرة بعد سياسي وبعد استراتيجي

بعد ١٧ سنة الجزيرة رجعت تاني للدولة العثمانية، وده بعد تسوية وتدخل من الدول الأوروبية

19/02/2026

زي النهاردة (١) رمضان
حصلت نقطة تحول كبيرة في تاريخ مصر
سقوط حصن بابليون
الحصن ده كان رمز للإمبراطورية الرومانية في مصر
واللي موجود لغاية دلوقتي في مجمع الأديان

ليه اللحظة دي كانت فارقة؟
لأنه لسنوات طويلة، مصر كانت مجرد "مخزن غلال" لروما
الفلاح المصري كان بيعاني من ضرايب تكسر الظهر ونظام إقطاعي بيسحب خير البلد عشان يغذي الناس اللي برة

15/02/2026

كل سنة وانتوا طيبين يا مصريين، رمضان كريم، ويا رب أبالسة الإنس تتكلبش هي كمان قبل أبالسة الجن، علشان الشهر ده يعدي على خير، وبمناسبة إنه شهر رمضان قرب، تعالوا نعرف حدوتة حصلت برضه في شهر رمضان مع حبيب الكل الأستاذ الدكتور الباشمهندس محمد علي باشا.

لما حصل الاحتلال الفرنسي على مصر عام 1798 بدأت المقاومة الشعبية في الإسكندرية بحكم إنها أول مدينة وصلتها الحملة الفرنسية، وبما إنه أصلا مكنش في جيش منظم، فااا أغلب اللي كانوا بيدافعوا عن الإسكندرية هما الأهالي اللي تطوعوا بعد ما سمعوا سعيد صالح في مسرحية العيال كبرت وهو بيقول " العار يا جبيصي يا ولدي البندجة يا هريدي".

بعد الإسكندرية وصل الجيش الفرنسي للقاهرة، والشعب المصري برضه لقى نفسه وش في وش مع الحملة الفرنسية، فااا رغم إنه الأهالي مش بالعين المماليك ونفسهم يغوروا في داهية، لكن وقت الجد نقف ندافع عن البلد، فاااا كل واحد يقدر يشيل السلاح انضم للجيش، هووووب حصلت العركة الشهيرة اللي هرب فيها مراد بيك للصعيد، وهرب إبراهيم بك للشام، بعد ما انهزموا من الجيش الفرنسي.

نابلوين افتكر إنه بكده سيطر على البلد وخلاص مفيش مماليك وانا هأبقى الكبير والكلمة كلمتي، هووووب على نهاية عام 1798 حصلت ثورة القاهرة الأولى، والصعاليك والحرافيش والتجار ومشايخ الأزهر والعلماء، كلم اتحدوا مع بعض، وبقى عندنا فعليا مقاومة شعبية بتواجه الاحتلال الفرنسي، خاصة إن المقاومة مكنتش محصورة في القاهرة، ده الفلاحين من القرى والبدو في الصحرا انضموا هما كمان للمقاومة.

علشان بس مانطولش... الروح دي فضلت مكملة حتى بعد ما الحملة الفرنسية أخدت بعضها ورجعت تاني على بلدها، بس السؤال هنا، روح المقاومة دي كانت مكملة ضد مين؟! أيوة... بالظبط كده... ده الوالي العثماني اللي السلطان العثماني بعته علشان يقعد على الكرسي ويحكم البلد، طالما طلعنا روح المقاومة اللي جوانا... يبقى محدش هيقدر ياكل ولا يشرب معانا، ويا نعيش عيشة فل يا تخرب على الكل.

مين بقى اللي قاعد بيتفرج على كل ده؟! محمد علي باشا اللي وصل مصر علشان يحارب الجيش الفرنسي ضمن الجيش العثماني، الباشا شاف مصر وعجبته وقال لنفسه هي دي، البلد دي لازم أبقى الحاكم ليها ومعايا هتروح في حتى تانية خالص، بس لأنه شايف روح المقاومة مكنش متسرع إنه يوصل للحكم... بالعكس كان سايب الكل يخبط في بعضه، وفي نفس الوقت كان بيتقرب من مشايخ الأزهر وبيعامل الصعاليك والحرافيش برأفة وحنية وبيعامل التجار باحترام.

ماطولش عليكوا قول طوّل، في عام 1805 محمد علي باشا بقى هو الوالي على مصر، وهو عارف إن القيادة الشعبية هي اللي وصلته لكرسي الحكم، لأن السلطان العثماني أصلا مكنش موافق إنه محمد علي باشا يبقى الوالي على مصر، والقيادات الشعبية عارفين برضه إنهم هما اللي وصلوا محمد علي باشا للمنصب ده، فاااا بقى في حتة كده من بتاع إحنا اللي جيبناك وانت بتاعنا تسمع كلامنا.

مع الوقت محمد علي باشا بدأ يتخنق مع القيادات الشعبية اللي وصلته للكرسي والمنصب، هو عنده تصور وعاوز يعمله، شايف الخير للبلد دي وعاوز يعمل دولة حديثة، والمشايخ باصين تحت رجلهم وعمالين يقولوا تعال يمين لأ تعال شمال، بلاش تكلم ده، بلاش تتعامل مع ده، ومع الوقت حس إنهم زيهم زي السلطان العثماني، مكتفين إيده ورجله على شريط السكة الحديد.

محمد علي باشا مكنش عارف يخلص من مشايخ الأزهر إزاي، لغاية ما هما نفسهم قدموا له الفرصة على طبق من ذهب، وقعوا في بعض واتخانقوا علشان كرسي "ناظر الأزهر"، منصب ناظر الأزهر ده هو اللي كان مسئوا عن كل الأمور المالية الخاصة بالجامع الأزهر، ودوما اللي كان بيمسك المنصب ده واحد من المماليك، لكن لما حصلت الحملة الفرنسية كل المماليك هربوا.

ولغاية ما محمد علي باشا حكم البلاد المنصب كان فاضي، فااا مشايخ الأزهر قالوا لنفسهم ليه لأ؟! البلد اتغيرت ومش لازم أمير مملوكي هو اللي يمسك المنصب، فاااا حصلت خناقة بين الشيخ عبد الله الشرقاوي والشيخ محمد الأمير، وكل مجموعة من المشايخ أخدوا صف واحد منهم، هووووب فاز الشيخ محمد الأمير بالمنصب وبدأ يصفي خلافاته مع المشايخ اللي كانوا ضده فااااا اتهدت المقاومة الشعبية وانطردن روح المقاومة مع الناس اللي طرده الأمير من الأزهر.

طوال الوقت لما كان كشايخ الأزهر فعلا همهم على البلد حتى لو مختلفين مع محمد علي باشا، كانوا إيد واحدة، والموضوع رايح جاي، مرة يطلعوا صح، مرة محمد علي باشا يطلع صح، لكن أول ما دخلت المصلحة بين المشايخ، وبقى الكلام على أغراض وأطماع شخصية رغم إنهم بيلبسوا الأغراض دي عباية المصلحة العليا، على طول اتكشفوا واتكسروا وبانت حقيقتهم.

12/02/2026

بمناسبة التعديل الوزاري المفاجئ في الدقيقة 96 من الوقت بدل الضائع، وخلاص بعد ما الكل عرف أسماء الوزراء اللي عليهم العين والنية، هوووووب وزير اتغير ووزارة اتلغت، وبما إننا اتكلمنا في حدوتة قبل كده إننا عندنا حكومات من عام 1837، يعني من 189 سنة عندنا رئيس حكومة ووزراء وليلة كبيرة قوي... فااااا تعالوا نعرف حدوتة قصيرة كده.

ناخد ونطلع على عام 1952... شهر مارس، الملك فاروق الأول اتصل على أحمد نجيب الهلالي باشا وطلب منه تشكيل الحكومة لأنه زي ما انت شايف البلد مش مستقرة والوضع قلق والدنيا بتخرب ولازم نعدل المايلة، فاااا الهلالي قال حاضر يا جناب الكوماندة المهم... هووووب شكل الوزارة ورفع شعار "التطهير قبل التحرير".

الباشا شاف إنه لازم نطهر البلد من الفاسدين الأول، بس هو مكنش مركز مع الحرامية والنصابين واللي بيسرقوا المال العام، هو كان مركز مع حزب الوفد اللي اتفصل منه، وحل البرلمان علشان مش عاوز وجع دماغ، وقال للصحف عاوزكم تنشروا الأخبار التافهة، واعلن الأحكام العرفية، حكومة من حديد ونار يعني.

استمرت الحكومة دي لغاية يوم 2 يوليو 1952، والملك فاروق الأول حس إن الهلالي باشا ناشف في التعامل مع الناس، وإنه كده ممكن يكون تأثيرها السلبي أكتر من الإيجابي، فاااا قال له مع السلامة واتعين حسين سري باشا رئيس مجلس الوزراء، بس حسين سري باشا ماعرفش يلم الدنيا، خاصة لما لغى نتيجة انتخابات نادي الظباط وشال محمد نجيب من رئاسة النادي.

هنا الملك فاروق حس إنه لازم البلد يبقى فيها حكومة قوية، واللي ماسكها لازم يبقى شخصية قوية، وطبعا مفيش أحسن من أحمد نجيب الهلالي باشا اللي كان بيصطدم مع أعضاء حزب الوفد لما بيشوف إنهم غلطانين، ولو شاف وزير من الوفد عليه فساد كان بيطلع يتكلم ويشلوحه، كان مقطع البطاقة بالبلدي كده ومش فارق معاه قريب أو غريب.

المهم...
يوم 22 يوليو صدر الأمر الملكي رقم 51 لسنة 1952 وطلب من أحمد نجيب الهلالي باشا إنه يشكل الحكومة من تاني، وإحنا آسفين يا صلاح إننا أقلناك من رئاسة الحكومة قبل كده، البلد دي فعلا محتاجة حكم من حديد، ومحتاجة واحد زيك عنده خيرة كبيرة، فااااا وافق أحمد الهلالي، ومش بس وافق... ده وهو قاعد في الإسكندرية مع الملك فاروق شكل الحكومة الجديدة وعرض عليه الأسماء.

هما بالظبط 18 ساعة والضباط الأحرار اتحركوا، قامت ثورة 23 يوليو، ومجلس قيادة الثورة طلب من أحمد الهلالي إنه يقدم استقالته، فااااا الهلاي اتصل على الملك فاروق الأول يسأله نعمل إيه، فاروق قال له قدم الاستقالة يا هلالي وأنا كمان هتنازل عن العرش وشكر الله سعيكم، هووووب استقال أحمد نجيب الهلالي من رئاسة الوزراء قبل حتى ما يدخل مكتبه في القاهرة، وانتهت بكده فترة من تاريخ مصر الحديث.

10/02/2026

بما إنه النهاردة مجلس النواب هيسمع بيان رئيس مجلس الوزراء اللي هيتم فيه إعلان أسماء الوزراء الجدد، واللي بعد الموافقة، الوزراء هيروحوا بكرة يحلفوا اليمين الدستوري علشان تبدأ الحكومة الخامسة للسيد الدكتور المهندس مصطفى مدبولي... تعالوا نعرف أصل الحدوتة.

هناخد ونطلع على عام 1824، محمد علي باشا كان عنده حلم إنه يعمل إمبراطورية مصرية تبقى مستقلة بذاتها وغير تابعة للإمبراطورية العثمانية، علشان كده كان مهتم يبني جيش قوي، يصلح البنية التحتية، يبعت وفود تتعلم برة، وفي وسط كل ده مكنش ناسي الإصلاح الإداري.

اللي كان متعارف عليه في مصر قبل كده إنه بيكون عندنا الوالي اللي بيحكم، ومعاه وزير هو اللي بيدير أمور الولاية، والوزير ده بيكون معاه محتسب اللي بيراقب الأسواق، وفي طبعا قائد للجيش، وشوية موظفين بقى، لكن مفيش هيكل إدارة ممسوك ولا اختصاصات واضحة.

في عام 1829 صدر قانون "السياستنامة الأولى" وبعده بكذا سنة صدر قانون "السياستنامة الثانية" اللي كانوا بينظموا الأمور الإدارية وبيحطوا عقوبات لفساد الموظفين وسرقة المال العام... يعني ممكن نعتبرهم أول خطوة لعملية الإصلاح الإداري.

في عام 1837 بقى طلع للنور قانون تالت، طبعا خلاص عارفين الاسم... قانون "السياستنامة الثالثة" اللي رسمت ملامح تشكيل أول حكومة في الدولة المصرية الحديثة، فااااا بقى عندنا حاجة اسمها "الديوان العالي" اللي هي رئاسة مجلس الوزراء، متقسم لـ 7 دواوين رئيسية... اللي هي 7 وزارات يعني.

الملفت بقى إنه طبقا لقانون السياستنامة الثالثة اترسخت القاعدة الأصيلة اللي إحنا شغالين عليها لغاية دلوقتي، كل إيرادات الدواوين تروح لديوان واحد، وكله يبقى متسجل بالورقة والقلم، والديوان ده بقى هو المسئول عن توزيع المصروفات على كل الدواوين، بدل ما كان كل ديوان هو المسئول عن إيراداته ومصروفاته، فاااا نلاقي إن المصروفات أكتر من الإيرادات.

من الحاجات الجميلة برضه إن كل القرارات اللي لها علاقة بالأمور الداخلية تطلع من ديوان واحد بس، مش كل ديوان يطلع تعليمات بمزاجه، ونكتشف مع الوقت إنه التعليمات عكس بعض والموظف قاعد محتاس، طبعا الحمد لله ده مش بيحصل دلوقتي... وموظف المحليات تحديدا ممكن يلاقي قرار من الوزير متعارض مع قرار من المحافظ... والدنيا ماشية سلطة.

برضه القانون ده حط فكرة الرقابة، يعني كل ديوان لازم في آخر السنة يقدم كشف حساب لديوان التفتيش، اللي النهاردة ممكن نعتبره الجهاز المركزي للمحاسبات، ومع كشف الحساب يكون موجود الإيصالات وصورة من كل القرارات، علشان ديوان التفتيش يشوف إيه الدنيا ويعرف عندنا حرامي ولا الناس محترمة وبتراعي ربنا.

وعلشان ماطولش عليكم... أول ديوان فيهم هو "ديوان الخديوي" والتاني "ديوان البحر" أما التالت فااااا هو "ديوان المدارس" وبعدها عندنا "ديوان الأمور الأفرنجية والتجارة" وطبعا في "ديوان الجهادية" وجنبه على طول "ديوان الفابريكات" وآخر حاجة بقى "ديوان الإيرادات".

كده بقى إحنا عندنا "الديوان العالي" اللي بيدير شئون الدولة المصرية، ورئيس الديوان ده كان دوما واحد من أسرة محمد علي باشا، وعلى عام 1840 رئيس الديوان بقى اسمه "الناظر" واللي بيكون نائب محمد علي باشا على حكم مصر، وفضلنا بقى شغالين بنظام "الديوان العالي" لغاية عهد الخديوي إسماعيل اللي برضه كان عاوز يعمل إصلاحات إدارية في مصر وتبقى على النظام الأوروبي.

المهم...
في عام 1878 صدر الأمر العالي بتشكيل النظارة بشكلها اللي إحنا نعرفه النهاردة، وكان نوبار باشا أول رئيس مجلس نظار أو ممكن نعتبره أول رئيس مجلس وزراء في مصر، واللي كانت بتتكون من نظارة الجهادية، نظارة الأشغال العمومية، نظارة الأوقاف، نظارة المعارف العمومية، نظارة المالية، نظارة الداخلية، نظارة الحقانية، ونظارة الخارجية وشكرا على كده واتعشت.

وفضلنا بقى ماشيين على موضوع رئيس مجلس النظار ده لغاية عام 1914، وقتها بريطانيا أعلنت الحماية على مصر، على اعتبار يعني إنها مكنتش محتلة مصر من 32 سنة، وإنه بسبب الحماية كده مصر استقلت عن الإمبراطورية العثمانية، على اعتبار يعني إنه مصر كانت لسة بتاخد التعليمات من الأستانة، فااا الخديوي هيبقى اسمه سلطان ومجلس النظار هيبقى اسمه مجلس الوزراء.

08/02/2026

بمناسبة إننا يوم الجمعة اللي فاتت عملنا أول طلعة جوية على قلعة صلاح الدين الأيوبي، وأخدناها من شرقها لغربها، ومن شمالها لجنوبها، فااااا أول مرة أخد بالي إنه القلعة دي مظلومة جدا في طريقة النشر أو الصور بتاعتها على المواقع الإخبارية المختلفة ومش بس كده... على الموقع الرسمي لوزارة السياحة والآثار.

يعني الصورة اللي حاضرة في دماغنا واللي دوما منتشرة عن قلعة صلاح الدين، هي صورة من بعيد لمسجد محمد علي باشا اللي موجود فوق القلعة، وكأنه القلعة دي كلها على بعضها مفيش فيها غير المسجد بس، وكأن مساحة قلعة صلاح الدين قريبة من مساحة المسجد، مع إن الواقع غير كده خالص.

يعني خليني أبدأ الكلام بمعلومة بسيطة قوي إنه مساحة قلعة صلاح الدين حوالي 30000 متر مربع ومساحة مسجد محمد علي باشا 5000 متر مربع، يعني في 25000 متربع مربع يمرح فيهم الخيل 3 أيام ما يجيب آخرهم، وده اللي يخلينا نسأل... هو إيه اللي موجود فوق قلعة صلاح الدين؟!

لما تدخل من بوابة القلعة وتطلع فوق عند مسجد محمد علي باشا هتلاقي على شمالك قصر مهجور وأعمال الترميم شغالة فيه دلوقتي، ده اسمه "قصر الجوهرة"، اتبنى في المكان ده علشان يطل من جهة على مسجد محمد علي باشا ومن الجهة التانية على النيل والأهرامات، وكان محمد علي باشا بيستقبل فيه الضيوف.

ولو انت برضه واقف عند مسجد محمد علي باشا، هتلاقي مسجد وراه له قبة خضراء جميلة، ده يبقى مسجد الناصر قلاوون، بناء السلطان المملوكي الناصر محمد بن قلاوون علشان يبقى المسجد الرسمي للقلعة، وده طبعا قبل مسجد محمد علي بحوالي 500 سنة، ولو دخلت المسجد هتلاقي إن الأعمدة متاخدة من معابد رومانية والأحجار متاخدة من الهرم، ولو بصيت في كتاب التاريخ هتلاقي المسجد في فترة الولاة العثمانيين اتحول لسجن.

تتمشى شوية هتلاقي نفسك عند المتحف الحربي اللي بيحكي تاريخ الجيش المصري كله، والمتحف ده شكله من برة يقول إنه حاجة لطيفة وصغيرة وهتخلص سريع سريع، لكن لما تدخل المتحف هتكتشف إنه 3 أدوار و120 غرفة، وحاجة كده محتاجة يوم لوحده علشان تتفرج وتقرأ كل الملاحظات اللي مكتوبة في كل غرفة عرض.

طيب المتحف الحربي ده أصلا كان إيه؟! ده كان "قصر الحرم"، واللي دخل المتحف شاف القصر ده فخم جدا إزاي، أهو ده بقى كان القصر اللي عايش فيه محمد علي باشا وزوجته وحريمه وخدمه، ولما حصل الاحتلال البريطاني بقى القصر ده هو مقر الحاكم البريطاني، وبعدها بقى مستشفى عسكري.

ورا المتحف الحربي هنلاقي في مسجد تالت اسمه مسجد سليمان الخادم، وهو اتبني في الفترة بين مسجد الناصر قلاوون ومسجد محمد علي باشا، بناه سليمان باشا الوالي العثماني على مصر، ويعتبر أول مسجد يتبنى في مصر له الطابع العثماني، وأصلا فكرة بناء المسجد في القلعة كانت عبارة عن رسالة سياسية... أنا مسيطر على البلد يا أولاد.

برضه في ظهر مسجد محمد علي باشا هنلاقي متحف الشرطة اللي اتعمل جنب سجن القلعة، افتتحه مبارك يوم 25 يناير عام 1986 احتفالا بعيد الشرطة، الجميل إنهم وهما بيحفروا علشان يبنوا متحف الشرطة، اكتشفوا مبنى أثري قديم مدفون ومهدود، وطلع ده "قصر الأبلق" اللي كان بناه الناصر قلاوون وهدمه محمد علي باشا علشان يبني المسجد بتاعه.

لما تخرج من متحف الشرطة هتلاقي في وشك باب من أبواب القلعة الخمسة اسمه "باب العزب"، وده واحد من أشهر أبواب القلعة، هتقولي ليه؟!... هأقولك علشان ده الباب اللي حصلت عنده مذبحة المماليك المشهورة بتاع محمد علي باشا، واللي من بعدها سيطر بشكل كامل على الحكم في مصر.

هتقولي معلش بقى.... وإحنا في الباص رايحين الأستاذ حاتم كان بيكلمنا عن بئر يوسف، وإنه صلاح الدين حفر بئر جوة القلعة علشان يوصل مياه النيل لجوة القلعة، البئر ده فين بقى إنت فضلت تلف معانا وماجبتش سيرته!!!

أقولك ما البئر ده انت معدي عليه وانت داخل القلعة في ظهر معرض شركة كنوز اللي في الأول... بس انت كنت مركز من السياح :] :] :]

05/02/2026

بمناسبة زيارة أردوغان إمبارح، والعربية الكهرباء اللي قدمها هدية للرئيس السيسي، واللي على حسب الصور، الاستقبال الرسمي كان في قصر الاتحادية مش في العاصمة الإدارية الجديدة، وبمناسبة كلامنا إمبارح عن ميدان العتبة، وقصر العتبة الحضراء اللي في لحظة من اللحظات محمد علي باشا خلاه مقر للحكم.... تعالوا نعرف حدوتة الحواديت. 😉

قصر الاتحادية أو قصر العروبة أو قصر هليوبوليس موجود في مصر الجديدة، وبسم الله ما شاء الله كمل دلوقتي 116 سنة، بس هو في الأصل مكنش قصر، ده كان فندق اسمه "جراند أوتيل" وكان واحد من أفخم الفنادق في مصر، في الستينات اتحول الفندق لمجمع وزارات، وفي عام 1972 لما السادات كان عاوز يعمل تحالف مع سوريا وليبيا، اختار القصر ده علشان يبقى هو مقر حكم الدولة الجديدة، فاااا بقى اسمه الاتحادية أو العروبة، ولما التحالف فشل فضل قصر الاتحادية هو المقر الرئاسي الرسمي.

طيب قبل ما قصر الاتحادية يبقى هو المقر الرئاسي الرسمي، الرئيس أنور السادات كان بيحكم مصر منين؟!
عاوز بس في الأول كده أفرق بين المقر الرئاسي الرسمي ومكان حكم مصر، لأنه مبارك مثلا كان بيحكم من الاتحادية، إنما أنور السادات وجمال عبد الناصر كانوا بيحكموا من بيوتهم وسايبين القصر لمقابلة الوفود الرسمية فقط، بس عامة يعني... قبل الاتحادية كان قصر عابدين هو القصر الرئاسي الرسمي.

قصر عابدين اللي بناه الخديوي إسماعيل، وعلشان يبنيه اشترى قصر قديم بتاع ظابط تركي اسمه عابدين بك، وضم للقصر القديم مئات الأفدنة، ويالا بينا يا جدعان نعمل قصر كبير، اتبنى عام 1874 يعني عنده دلوقتي 152 سنة، ورغم إنه قصر عابدين أصغر القصور مساحة، لكنه أهم واحد في القصور دي... ده كفاية قوي إن عبد المطلب غنى ساكن في حي السيدة وحبيبي ساكن في عابدين.

السادات هو اللي اختار قصر عابدين يبقى هو المقر الرئاسي الرسمي، وده على عكس جمال عبد الناصر اللي كان مختار قصر القبة، واللي بقى عنده دلوقتي 153 سنة، القبة هو اللي عنده 153 سنة مش عبد الناصر :] برضه بناء الخديوي إسماعيل، وبرضه بناه على أطلال قصر قديم، بس القصر المرة دي مش لظابط... ده كان قصر أبوه إبراهيم باشا، وهنلاحظ أصلا إنه أغلب القصور الرئاسية بناها الخديوي إسماعيل، اللي كان عاوز ينقل الحكم من القلعة لقلب القاهر.

في عهد محمد نجيب بقى... كان مقر الحكم هو قصر عابدين، علشان كده بقول لكم إن قصر عابدين مميز جدا، لأنه كان مقر حكم الديار المصرية من عهد الخديوي إسماعيل لغاية الرئيس محمد نجيب، بس هنا في ملحوظة... قصر عابدين اتبنى سنة 1874، والخديوي إسماعيل قعد على الكرسي سنة 1863... يعني في 11 سنة قبل بناء القصر، الخديوي إسماعيل كان بيحكم منين بقى؟!

قبل قصر عابدين كان مقر إقامة الوالي ومقر حكم مصر هي قلعة الجبل... هتقولي فين قلعة الجبل دي؟! هأقولك انت عارفها كويس... دي قلعة صلاح الدين الأيوبي يا معلم، القلعة الجميلة اللي على جبل المقطم وفيها مسجد محمد علي باشا، أهو دي بقى كانت مقر حكم مصر بداية من صلاح الدين الأيوبي وطوال فترة الدولة المملوكية وخلال فترة الولاة العثمانيين، وصولا لمحمد علي باشا وحفيده الخديوي إسماعيل.

صلاح الدين الأيوبي بقى كان عاوز ينهي على أي أثر للفاطميين، هو حرفيا عمل لهم حربا إبادة علشان مايبقاش في أي حد من نسلهم أو ذريتهم يطلع يقولك أنا حفيد الخليفة، علشان كده لغاية النهاردة هتلاقي مصريين من أصول عربية وشركسية وتركية وكردية وأرمينية... بس مش هتلاقي مصريين من أصول فاطمية، المهم يعني في عهد الدول الفاطمية كان الحكم من شارع المعز.

فاكرين ثلاثية نجيب محفوظ الخطيرة، بين القصرين، قصر الشوق والسكرية، هو إيه المقصود بـ "بين القصرين"؟! ماهو أحداث الرواية بتدور في شارع المعز، اللي وقت الدولة الفاطمية كان فيه قصرين، القصر الشرقي وده كان مقر الحكم، والقصر الغربي وده كان بتاع الخليفة برضه لكنه كان أصغر في المساحة.

يبقى إحنا كده مع بداية الدولة الفاطمية مقر الحكم كان في القصر الشرقي في شارع المعز، ومع بداية الدولة الأيوبية الحكم انتقل لقلعة الجبل فوق في المقطم، بعدها نزلنا تاني لقلب القاهرة في قصر عابدين وده في عهد الخديوي إسماعيل، وفي عهد جمال عبد الناصر روحنا لقصر القبة، وفي عهد السادات رجعنا تاني لقصر عابدين وبعدها طلعنا على الاتحادية، والنهاردة ما بين الاتحادية والقصر الرئاسي في العاصمة الإدارية.

طيب مقر الحكم كان فين قبل الدولة الفاطمية؟!
دي بقى حدوتة تانية :] :] :]

حواديت البلدان

22/02/2026

21/02/2026

20/02/2026

19/02/2026

15/02/2026

12/02/2026

10/02/2026

08/02/2026

05/02/2026

Address

Website

Alerts

Shortcuts

Share