15/08/2026
بمناسبة زيارة رئيس الوزراء لمركز زفتى في محافظة الغربية، والست البسيطة اللي بتقول له الكشف 5 جنيه والعلاج مجاني، وبياخدونا من العيادة يوصلونا لغاية البيت بطائرة مروحية أحدث موديل.
وبمناسبة تصريحات وزير الصحة عن علاج الأنسولين اللي أكد فيه إن التصنيع المحلي أحلى وأجمد وأفضل من المستورد وإحنا جامدين قوي بصوت عادل إمام في فيلم "مرجان أحمد مرجان".
تعالوا ناخد ونرجع لورا شوية حلوين، وننزل بالتوكتوك عند محطة عام 1279 لما المنصور سيف الدين قلاوون بقى هو سلطان الدولة المملوكية، وبعد سنتين من حكمه اتصل على العالم والطبيب ابن النفيس وطلب منه إنه يبني "البيمارستان المنصوري".
هتقولي اشمعنى يعني اتصل على ابن النفيس؟!
هأقولك لأنه ابن النفيس اتعلم الطب في دمشق، وكان عالم محترم الكل بيشهد له بالكفاءة، ده غير إنه كان الطبيب الخاص للسلطان الظاهر بيبرس، يعني واحد مصدر ثقة، بس بلاش تسأل ليه السلطان قلاوون قرر يبني بيمارستان لأنه مش معروف.
ناس بتقول إنه في عهد الظاهر بيبرس، قلاوون كان مشارك في عركة ضد الروم وتعب والأطباء عالجوه في دمشق، فااا وعد ربنا إنه لو بقى في يوم من الأيام سلطان هيبني بيمارستان مفيش قبله ولا بعده، وفي ناس بتقول إنه بعد ما بقى أصدر قرار والمواطنين نفضوا فااااا دور فيهم القتل 3 أيام، وعلشان يكفر عن ذنبه قرر يبني البيمارستان.
هتقولي طيب عدم اللامؤاخذة بقى هو إيه البيمارستان ده أصلا؟!
هأقولك لما تزور شارع المعز هتلاقي على يمينك يافطة مكتوب عليها "مستشفى رمد قلاوون"، أهو مستشفى الرمد دي مبنية على حديقة البيمارستان الناصري، اللي هي تعتبر واحدة من أكبر المستشفيات في المنطقة وقتها، وبتقدم خدمات طبية في تخصصات مختلفة، لدرجة إنه كان فيها قسم للأمراض العقلية اسمه "مورستان".
مبدئيا كده المستشفى كان العلاج فيها بالمجان، الوزير زي الغفير، والحر زي العبد، وعلشان السلطان يضمن إنه ماحدش في يوم يقول أصله مفيش إمكانيات وأجيب لكم منين، كان مخصص أوقاف تصرف على المستشفى وعلى أقسامها، لأنه كان معين رئيس لكل قسم... آه والبيمارستان كان فيها قسم طوارئ :]
مش بس كده، البيمارستان كان فيها عيادات خارجية وكمان بتعمل زيارات منزلية للمرضى اللي مش قادرين يروحوا المستشفى، ده غير إنه كان فيها مدرسة لتعليم الطب علشان يبقى عندنا أجيال جديدة تعرف تعالج الناس الغلابة... يسكت قلاوون على كده؟! لا.... المريض اللي يدخل المستشفى ويتعالج، وهو يخارج ياخد 5 دينار إعانة عما يقدر يقف على رجله ويشتغل.
هتقولي دي خدمة 5 نجوم، هأقولك خد الكبيرة بقى، البيمارستان كان بيعالج حوالي 4000 مريض يوميا في الأقسام المختلفة، وفس الصيف كانوا بيصرفوا مراوح من الخوص علشان التهوية، وفي الشتاء بيولعوا نوع معين من البخور علشان التدفئة، ده غير حفلات الغناء والموسيقى والحواديت اللي بتتحكى للمرضى علشان يخففوا عنهم آلام المرض وطول الانتظار.
ولأنه طبعا مفيش حاجة بتدوم على حالها، بعد وفاة السلطان قلاوون، ومع الوقت بدأ الخدمة في البيمارستان تبقى أسوأ في أسوأ لغاية ما أغلب القسم بتاع النساء اتهدم تماما، وقسم الرجال معتش فاضل منه مغطس المياه الكبريتية وشوية عنابر.
