31/08/2026
تعديل : تم مسح الجرافيتي وتم التعديل ! شكرا لكل واحد ساهم في نشر ومنع الصور الغير حقيقيه عن الحضارة المصرية حتي لو كانت النية سليمه 🙏👏👏👏
أولًا، فكرة الهجوم على الجرافيتي أو اتهام العمل بأنه يشبه الأفروسنتريك أو لا يشبههم، في رأيي، مش هي أصل المشكلة. المشكلة الحقيقية هي التعنّت، ورفض الرجوع إلى الأصل التاريخي.
أحيانًا الشخص اللي مش متخصص في التاريخ أو الآثار ممكن ما يكونش مستوعب أصلًا يعني إيه «أفروسنتريك»، وإيه الأفكار اللي بتتبناها بعض التيارات الأفروسنتريكية في تفسير التاريخ المصري القديم. لكن المفارقة إن أكتر ناس المفروض يكون عندها وعي بالموضوع هم الناس اللي شغالة في المجال نفسه.
إحنا عندنا أصل أثري موجود قدامنا. ليه نسيب الأصل ونروح للسوشيال ميديا أو للـAI عشان نحدد شكل الشخصية؟
لو بنتكلم عن نفرتيتي، عندنا التمثال الشهير، وعندنا تماثيل ومناظر ونقوش مصرية قديمة نقدر نرجع لها. وبالتالي لما نعمل إعادة تصور لشخصية تاريخية، لازم نسأل: إحنا بنعيد تقديم الأصل، ولا بنعيد اختراع شخصية جديدة؟
وهنا أنا مش ضد الجرافيتي نفسه. بالعكس، الفكرة جميلة جدًا، ويا ريت نشوف الفن المصري القديم حاضر في كل ميادين وشوارع مصر. لكن الجميل إننا نحافظ في الوقت نفسه على الهوية والأصل التاريخي للعمل.
المشكلة تبدأ لما يتحول التفسير الفني إلى تغيير متعمد في السمات الأصلية للشخصية، ثم نقول: «هي كده وخلاص»، من غير ما نرجع للمصدر الأثري.
إحنا مش محتاجين نختلف لمجرد الاختلاف.
ميدان التحرير قريب من المتحف المصري، والأصل موجود أمامنا. ادخل المتحف، شوف التمث�
