30/09/2026
𝐌𝐮𝐬𝐞𝐨 𝐓𝐮𝐥𝐚 𝐭𝐚 𝐡𝐨𝐧𝐫𝐚 𝐥𝐞𝐠𝐚𝐝𝐨 𝐝𝐢 𝐂𝐞𝐝 𝐑𝐢𝐝𝐞 𝐤𝐮 𝐮𝐧 𝐡𝐨𝐦𝐞𝐧𝐚𝐠𝐞 𝐩𝐨́𝐬𝐭𝐮𝐦𝐨
Museo Tula ta invitá komunidat di Kòrsou pa asistí na un anochi spesial dediká na bida, obra i legado di e artista inolvidabel Cedric “Ced Ride” Ridderplaat. E homenage póstumo lo tuma lugá dia 2 di òktober 2026, di 7:00 PM pa 10:00 PM, na Museo Tula. Portanan ta habri for di 6:15 PM. Entrada ta grátis, pero reservashon ta obligatorio.
Bou di inisiativa di direktiva di Museo Tula, pa algun aña kaba e museo ta organisá homenage na personanan i gruponan ku a duna un aporte signifikativo na nos komunidat i kultura. Den añanan anterior, entre otro Marwin Ricardo den felis memoria, Chin Behilia i tambe Grupo Serenada a risibí e rekonosementu aki. E biaha aki Museo Tula ta dirigí su atenshon na un di e figuranan multifasétiko ku a laga un marka profundo den historia kultural di Kòrsou: Ced Ride.
Ced Ride tabata muchu mas ku un kantante i kompositor. E tabata tambe poeta, eskritor, aktor, pintor, eskultor, edukadó i investigadó, ku un amor profundo pa Kòrsou, su historia, kultura i idioma. Su aporte na promoshon di Papiamentu ta un elemento importante den su legado.
E homenage tin un nifikashon ainda mas spesial den 2026. Henter e aña aki Museo Tula ta traha bou di e lema “Ta Yu’i Kòrsou nos ta”, inspirá pa e komposishon di Ced Ride “Ta Yu Di Kòrsou Mi Ta”. Den e piesa aki, Ced Ride ta pone énfasis riba identidat i riba e importansia di no lubidá nos rais i nos konekshon ku Kòrsou, kaminda ku nos ta.
Durante e anochi lo tin bar i kushina bon surtí na preis di famia i tambe esnan presente por apresiá algun di e obranan ku Ced Ride a pinta. Tambe diferente persona ku a konosé Ced Ride òf ku tin konosementu profundo di su obranan lo kontribuí na e homenage. Christian Peterson, komo amigu di Ced Ride, lo kompartí anékdotanan spesial di e.o nan infansia, dunando públiko un bista mas personal riba e hende tras di e artista. Martha Dijkhoff, eksperto linguístiko, lo elaborá riba e amor profundo ku Ced Ride tabatin pa Papiamentu i lo analisá e manera ku idioma, identidat i kultura ta reflehá den letra di su kansionnan. Ernesto “Tico” Vos a prepará un dokumentario interesante tokante e artista, ku tambe ta forma parti di e programa.
Músika naturalmente no por falta den un homenage na Ced Ride. Morgan Isenia lo deleitá esnan presente ku algun di Ced Ride su piesanan romántiko. Ademas, e programa ta konta ku presentashonnan spesial di Farley Lourens, Grupo di Baile Harmonia i Goso i Grupo Ekis.
Bou di guia di Glenn Thomas komo moderadó, e anochi ta duna e públiko oportunidat pa no solamente wak bèk riba e trayektoria di Ced Ride, sino tambe pa eksperensiá su legado pa medio di historia, idioma, músika, baile i rekuerdonan personal.
Pa mas informashon i reservashon, bish*tá www.fundashonmuseotula.com òf manda un e-mail na [email protected].
