08/30/2026
Yon popilasyon k ap soufri pandan plizyè lanne, ki ap fè fas ak yon miltitid pwoblèm, lè se pa wout yo ki pa bon, se grangou, lè se pa presyon bandi, se pwoblèm dlo. Nou te fè yon rive nan zòn gran bwa ki sitiye anba segen, lè w fin kite Fon Jan-Nwèl w ap monte, nou te konstate se ak anpil difikilte pou moun k ap viv nan zòn sa yo, sòti depi Fon Jan-Nwèl pou rive Gran bwa , jwenn dlo pou yo sèvi, sa ki fè genyen ki oblije desann nan yon zòn ki rele Latig pou y al pran dlo pou yo sèvi.
Mete sou sa, n ap gade eta wout moun yo ap fè trajè sa yo, se tèt chaje. Yon moto ap pote 6 a 7 doum dlo (doum ki konn gen lwil yo) nan yon wout ki gen kote menm 2 moto paka kwaze pandan nan dènye jou sa yo, nèg ki gen pouvwa yo, politisyen mafya nou yo ap fredone yon sèl chanson ki se ELEKSYON .
Nou t ap renmen konnen èske moun k ap viv nan zòn yo p ap gen pou wè ak eleksyon y ap pale a?
Nou ta renmen konnen èske moun ki nan zòn sa yo pa bezwen viv yon bon vi tou?
Pa gen wout, popilasyon an pan an sekirite ( nou jwenn yon sou komisarya depi peredo aprè se jis segen n pral jwenn yon lòt), pa gen manje, pa gen dlo, timoun yo paka al lekòl, se wè yo wè yo la men yo pa okouran si y ap viv vrèman epi kounya nou pwomèt yo eleksyon, pandan chaje pouvwa ki pase deja ki pa regle anyen pou yo.
Mesyedam, moun nou rele moun nan mòn yo bezwen viv byen, nou dwe ankadre yo, paske gen anpil bagay yo ka fè nan zòn sa yo tankou chou, pwawo, pèsi, kawòt elatriye. Men si lapli pa tonbe yo p ap jwenn dlo pou fè plantasyon yo, li pa bon konsa.
Otorite konsène yo, an n vire je gade popilasyon ki nan milye rekile yo, yo fè pati peyi a tou, yo bezwen viv tou, resous peyi a chita sou do yo yon kote tou lè n ap gade kòman yo gen enèji pou travay.
N ap denonse epi fè yon apèl ak Otorite yo pou pa kite moun nan zòn sa yo sèl, paske y ap bezwen sa anpil.
