06/12/2026
ဇွန်လ ၆ ရက်နေ့ လူထုခေါင်းဆောင် ဒေါ်အောင်ဆန်းစုကြည်၏မွေးနေ့ ဆုတောင်းပွဲတွင် Kim Aris - Htein Lin ပြောကြာသွားတာကို မြန်မာဘာသာပြန်ထားတာပါ။
====================
မင်္ဂလာညချမ်းပါခင်ဗျာ။ မင်္ဂလာပါ
ဒီနေ့ ဒီနေရာမှာ ကျွန်တော့်ကို နွေးထွေးစွာ ကြိုဆိုပေးကြတဲ့အတွက် အထူးကျေးဇူးတင်ပါတယ်။
ထို့အပြင် ယနေ့အခမ်းအနားကို စီစဉ်ပေးခဲ့သည့် Burmese Community Development Collaboration အဖွဲ့အားလည်း အထူးပင် ကျေးဇူးတင်ရှိပါသည်။ ပြီးခဲ့သည့် ငါးနှစ်တာကာလအတွင်း မြန်မာအသိုင်းအဝိုင်းအတွက် သူတို့ဆောင်ရွက်ပေးခဲ့သမျှ အားလုံးအတွက်လည်း လေးနက်စွာ ဂုဏ်ပြုလိုပါတယ်။
ယနေ့ ကျွန်တော် ဒီစင်မြင့်ပေါ်မှာ ရပ်တည်နေတာဟာ ဒေါ်အောင်ဆန်းစုကြည်ရဲ့ သားတစ်ယောက်အဖြစ်သာ မဟုတ်ပါဘူး။ သူမရဲ့ အသက်အန္တရာယ်အတွက် အလွန်စိုးရိမ်ပူပန်နေသူတစ်ဦးအဖြစ်လည်းကောင်း၊ မြန်မာနိုင်ငံရဲ့ ရက်စက်ကြမ်းကြုတ်တဲ့ စစ်အာဏာရှင်စနစ်အောက်မှာ ဆင်းရဲဒုက္ခခံစားနေဆဲ သန်းပေါင်းများစွာသော ပြည်သူတွေအတွက်လည်းကောင်း ရပ်တည်နေတာ ဖြစ်ပါတယ်။
ဒီအခြေအနေဟာ ကျွန်တော့်နှလုံးသားရဲ့ အနက်ရှိုင်းဆုံးနေရာအထိ ထိုးဖောက်နာကျင်စေပါတယ်။
သားတစ်ယောက်အနေနဲ့ ကျွန်တော် လိုချင်တာ အလွန်ရိုးရှင်းပါတယ်။ ကျွန်တော့်အမေ ကျန်းမာလုံခြုံနေတယ်ဆိုတာ သိချင်တယ်။ သူမရဲ့အသံကို ကြားချင်တယ်။ သူမရဲ့မျက်နှာကို မြင်ချင်တယ်။ သူမဘဝရဲ့ ကျန်ရှိနေသေးတဲ့ နှစ်များအတွင်း သူမနဲ့အတူ အချိန်တွေကို ဖြတ်သန်းခွင့်ရချင်တယ်။
ကမ္ဘာပေါ်မှာ ဘယ်မိသားစုမဆို မိမိတို့ရဲ့ မိခင် အသက်ရှင်နေသေးသလား ဆိုတာ သိခွင့်ရရှိဖို့ဆိုတဲ့ အခြေခံလူ့အခွင့်အရေးကို မဆုံးရှုံးသင့်ပါဘူး။
မေမေဟာ သူမဘဝရဲ့ လေးပုံတစ်ပုံကျော်ကို စစ်တပ်ရဲ့ နေအိမ်အကျယ်ချုပ်နဲ့ အကျဉ်းထောင်များအတွင်း ကုန်ဆုံးခဲ့ရပါတယ်။ ဒီမိုကရေစီကို ငြိမ်းချမ်းစွာ ကာကွယ်မြှင့်တင်ခဲ့တဲ့အတွက်သာ ဖြစ်ပါတယ်။ ကျွန်တော်တို့ မိသားစုဟာ ဆယ်စုနှစ်များစွာအတွင်း စိတ်ပိုင်းဆိုင်ရာ ဖိအားပေးမှုတွေ၊ ဓားစာခံသဘောထားနဲ့ ဆက်ဆံမှုတွေ၊ ရည်ရွယ်ချက်ရှိရှိ လိမ်လည်လှည့်ဖြားမှုတွေကို အကြိမ်ကြိမ် ခံစားခဲ့ရပါတယ်။
ပြီးခဲ့တဲ့ ငါးနှစ်အတွင်းမှာပင် စစ်အုပ်စုဟာ မေမေကို တစ်နေရာမှ တစ်နေရာသို့ ရွှေ့ပြောင်းထားတယ်လို့ အကြိမ်ကြိမ် ထုတ်ဖော်ပြောဆိုခဲ့ပါတယ်။ ဒါပေမယ့် အဆိုအားလုံးဟာ နောက်ဆုံးမှာ မမှန်ကန်ကြောင်း ပေါ်ပေါက်ခဲ့ရပါတယ်။
မကြာသေးမီက စစ်အာဏာရှင်အစိုးရက မေမေကို လျှို့ဝှက်အကျဉ်းခန်းတစ်ခုမှ နေပြည်တော်ရှိ မသိရသေးသော လျှို့ဝှက်နေရာတစ်ခုတွင် နေအိမ်အကျယ်ချုပ်သို့ ပြောင်းရွှေ့ထားကြောင်း ကြေညာခဲ့ပါတယ်။ ဒါဟာ နိုင်ငံတကာရဲ့ ဝေဖန်ရှုတ်ချမှုတွေကို လျော့ပါးစေဖို့နဲ့ သူတို့အတွက် တရားဝင်မှု ရယူဖို့ ရည်ရွယ်ထားတဲ့ နိုင်ငံရေးတွက်ချက်မှုတစ်ခုသာ ဖြစ်ပါတယ်။
သို့သော် ကျွန်တော်တို့ဟာ မေမေ ဘယ်မှာရှိသလဲ၊ သူမ ဘယ်လိုရှိသလဲ၊ လုံခြုံရဲ့လား ဆိုတဲ့ မေးခွန်းတွေကို မရပ်မနား ဆက်လက်မေးမြန်းနေဆဲ ဖြစ်ပါတယ်။
ဒါပေမယ့် ကျွန်တော်တို့ ရရှိခဲ့တာက ဆက်သွယ်ခွင့် လုံးဝမရှိခြင်းနဲ့ ပွင့်လင်းမြင်သာမှု လုံးဝမရှိခြင်းပဲ ဖြစ်ပါတယ်။ ယနေ့အထိ မေမေ အသက်ရှင်နေကြောင်းကို သီးခြားလွတ်လပ်သော အဖွဲ့အစည်းများက အတည်ပြုနိုင်မည့် သက်သေအထောက်အထား တစ်စုံတစ်ရာမျှ မပြသနိုင်သေးပါဘူး။
စစ်အုပ်စုရဲ့ ဒီလို လုံးဝပွင့်လင်းမှုမရှိတဲ့ အပြုအမူဟာ ကျွန်တော်တို့ရဲ့ အကြီးမားဆုံး စိုးရိမ်ပူပန်မှုကို ပိုမိုနက်ရှိုင်းစေပါတယ်။ အဲဒါကတော့ သူမ အသက်မရှင်တော့ဘူးလား ဆိုတဲ့ ကြောက်ရွံ့မှု ဖြစ်ပါတယ်။
ကျွန်တော်တို့ အလွန်ရှင်းလင်းစွာ ပြောကြားလိုပါတယ်။
မေမေဟာ ယနေ့ စစ်အုပ်စုရဲ့ ဓားစာခံတစ်ဦး ဖြစ်နေပါတယ်။ နိုင်ငံတကာရဲ့ အသိအမှတ်ပြုမှုကို အသည်းအသန် လိုလားနေတဲ့ စစ်အုပ်စုအတွက် နိုင်ငံရေးအလဲအလှယ်ကဒ်တစ်ခုအဖြစ် အသုံးချခံနေရတာ ဖြစ်ပါတယ်။
သူတို့ဟာ ASEAN နဲ့ ကမ္ဘာ့နိုင်ငံများကို မကြာသေးမီက ကျင်းပခဲ့တဲ့ အတုအယောင် ရွေးကောက်ပွဲတွေကို အသိအမှတ်ပြုစေချင်ပါတယ်။
အဲဒီလို အသိအမှတ်ပြုခံရခြင်းက သူတို့ရဲ့ အာဏာသိမ်းအစိုးရကို တရားဝင်မှု ပေးလိုက်သလို၊ ကိုယ့်ပြည်သူအပေါ် ကျူးလွန်ခဲ့တဲ့ ရက်စက်ကြမ်းကြုတ်မှုတွေကိုလည်း တရားဝင်မှု ပေးလိုက်သလို ဖြစ်စေမှာ ဖြစ်ပါတယ်။
ဒါဟာ ၂၀၂၁ ခုနှစ်တွင် မေမေဦးဆောင်သော ဒီမိုကရေစီအင်အားစုကို ဒုတိယအကြိမ် ဆက်တိုက် အပြတ်အသတ် အနိုင်ရရှိစေခဲ့တဲ့ မြန်မာပြည်သူ ၅၅ သန်းကျော်ရဲ့ ဆန္ဒကို ဖျက်သိမ်းပစ်ဖို့ ကြိုးပမ်းခြင်းလည်း ဖြစ်ပါတယ်။ အဲဒီရွေးကောက်ပွဲကို ASEAN နဲ့ နိုင်ငံတကာအသိုင်းအဝိုင်းက လွတ်လပ်ပြီး တရားမျှတသော ရွေးကောက်ပွဲအဖြစ် အသိအမှတ်ပြုခဲ့ကြပါတယ်။
ထို့အပြင် စစ်အုပ်စုရဲ့ လုပ်ရပ်တွေဟာ မေမေကို နှစ်ပေါင်းများစွာ မိတ်ဆွေကောင်းအဖြစ် အသိအမှတ်ပြုခဲ့တဲ့ အိမ်နီးချင်းနိုင်ငံများ၊ အထူးသဖြင့် တရုတ်နိုင်ငံ၏ ရပ်တည်ချက်များနှင့်လည်း ဆန့်ကျင်လျက် ရှိပါတယ်။
အသက် ၈၁ နှစ်အရွယ် နိုဘယ်ငြိမ်းချမ်းရေးဆုရှင်တစ်ဦး အသက်ရှင်နေကြောင်း ယုံကြည်စိတ်ချရသော သက်သေ မပြနိုင်သေးဘဲ၊ ပွင့်လင်းမြင်သာမှုနှင့် အခြေခံလူ့အခွင့်အရေးဆိုင်ရာ ကမ္ဘာ့တောင်းဆိုမှုများကို ဆက်လက် လျစ်လျူရှုနေသော အစိုးရတစ်ရပ်ကို တရားဝင်မှုမပေးသင့်ပါဘူး။
မေမေရဲ့ ၈၁ နှစ်ပြည့် မွေးနေ့ကို ကြိုဆိုတဲ့အနေနဲ့ ကျွန်တော်ဟာ Global Proof of Life Challenge ကို စတင်ခဲ့ပါတယ်။ ကျွန်တော်တို့ တောင်းဆိုတာ တစ်ခုတည်းသာ ဖြစ်ပါတယ်။ မေမေ အသက်ရှင်နေဆဲဖြစ်ကြောင်း ယုံကြည်စိတ်ချရပြီး လွတ်လပ်စွာ အတည်ပြုနိုင်သော သက်သေပြချက်ကို ပြသပါ။
ဇွန်လ ၁ ရက်နေ့မှ ၁၉ ရက်နေ့အထိ ကမ္ဘာတစ်ဝန်းရှိ ပြည်သူများအားလုံးကို ဒီအစီအစဉ်မှာ ပါဝင်ဖို့ ဖိတ်ခေါ်ထားပါတယ်။
မေမေရဲ့ ၈၁ နှစ်ပြည့် မွေးနေ့ကို ဂုဏ်ပြုသောအားဖြင့် “81 for 81” စိန်ခေါ်မှုများကို ပြုလုပ်နိုင်ပါတယ်။ ဥပမာအားဖြင့် ခြေလှမ်း ၈၁,၀၀၀ လှမ်းခြင်း၊ ၈၁ ကီလိုမီတာ ပြေးခြင်း၊ ၈၁ မိုင် စက်ဘီးစီးခြင်း သို့မဟုတ် ကိုယ်ပိုင် ၈၁ စိန်ခေါ်မှုတစ်ခု ဖန်တီးပြီး ပါဝင်နိုင်ပါတယ်။ တစ်ဦးချင်းဖြစ်စေ၊ မိသားစုလိုက်ဖြစ်စေ၊ အဖွဲ့အစည်းများ၊ အသင်းအဖွဲ့များအဖြစ်ဖြစ်စေ ပါဝင်နိုင်ပါတယ်။
အားလုံးရဲ့ လှုပ်ရှားမှုတွေကို နှင့် ဟက်ရှ်တက်များဖြင့် မျှဝေပေးခြင်းအားဖြင့် စည်းလုံးညီညွတ်မှုကို ပြသနိုင်ပါတယ်။
ဒီစိန်ခေါ်မှုမှာ ပါဝင်သူ ပိုများလာလေလေ ကျွန်တော်တို့ရဲ့ စုပေါင်းအသံ ပိုမိုကျယ်လောင်လာလေလေ ဖြစ်ပြီး ကမ္ဘာကြီးရဲ့ အမှန်တရားတောင်းဆိုမှုကို စစ်အုပ်စုအနေနဲ့ လျစ်လျူရှုဖို့ ပိုမိုခက်ခဲလာမှာ ဖြစ်ပါတယ်။
ကျွန်တော်ကိုယ်တိုင်တော့ ဒီ Proof of Life Challenge အတွက် တစ်ရက်အတွင်း စကိတ်ဘုတ်ဖြင့် ၈၁ ကီလိုမီတာ စီးသွားမှာ ဖြစ်ပါတယ်။
ကျွန်တော်တို့ အတူတကွ မျှော်လင့်ချက်ကို တည်ဆောက်နိုင်ပါတယ်။ အမှန်တရားအတွက် တောင်းဆိုသံကို ပိုမိုကျယ်လောင်စေနိုင်ပါတယ်။ စစ်အုပ်စုအနေနဲ့ ဆိတ်ဆိတ်နေဖို့ ပိုမိုခက်ခဲစေနိုင်ပါတယ်။
ဒါကြောင့် ကျွန်တော်တို့ အတူတကွ မေးကြပါစို့။
“အသက်ရှင်နေကြောင်း သက်သေပြပါ။”
မြန်မာပြည်သူများအားလုံးနှင့် ဩစတြေးလျနိုင်ငံတွင် နေထိုင်နေကြသော မိတ်ဆွေများအားလုံးကို ကျွန်တော် ပြောလိုပါတယ်။ သင်တို့ရဲ့ အသံဟာ အရေးကြီးပါတယ်။ သင်တို့ရဲ့ လွှတ်တော်ကိုယ်စားလှယ်များကို ဆက်သွယ်ပါ။ စစ်ဝတ်စုံကို အရပ်ဝတ်နဲ့ လဲထားတဲ့ ဒီစစ်အုပ်စုကို လက်မခံဖို့ တိုက်တွန်းပါ။အပြစ်မဲ့ အရပ်သားများအပေါ် လေကြောင်းဗုံးကြဲတိုက်ခိုက်မှုများကို ရပ်တန့်စေမည့် အရေးယူဆောင်ရွက်မှုများကို ထောက်ခံဖို့ တောင်းဆိုပါ။ ထို့အပြင် မြန်မာပြည်သူများထံ တိုက်ရိုက်ရောက်ရှိမည့် လူသားချင်းစာနာထောက်ထားမှု အကူအညီများကို ဆက်လက်ထောက်ပံ့ပေးဖို့လည်း တိုက်တွန်းပါ။
နောက်ဆုံးအနေနဲ့ ပြောချင်တာ တစ်ခုရှိပါတယ်။
ပြီးခဲ့တဲ့ ငါးနှစ်ဟာ သင်တို့အများစုအတွက် ခက်ခဲကြမ်းတမ်းခဲ့သလို ကျွန်တော့်အတွက်လည်း လွယ်ကူခဲ့တာ မဟုတ်ပါဘူး။ဒါပေမယ့် ကျွန်တော်တို့ သိထားတဲ့ အမှန်တရားတစ်ခု ရှိပါတယ်။ ကျွန်တော်တို့ဟာ မှန်ကန်တဲ့အရာအတွက် တိုက်ပွဲဝင်နေကြတာ ဖြစ်ပါတယ်။ မှန်ကန်တဲ့အရာအတွက် ရပ်တည်နေသရွေ့ ကျွန်တော်တို့ ဆက်လက်လျှောက်လှမ်းနိုင်ပါတယ်။ မရပ်မနား ဆက်လက်တိုက်ပွဲဝင်နိုင်ပါတယ်။ ဒီအချက်ကိုပဲ စစ်တပ်က နားမလည်ခဲ့တာ ဖြစ်ပါတယ်။
ကျေးဇူးတင်ပါတယ်။
