04/10/2026
வேப்பங்கரனை...
காஞ்சிபுரம் மாவட்டம், மதுராந்தகம் வட்டத்தில் அமைந்துள்ள கிராமம். அருகிலுள்ள அனந்தமங்கலம், ஒரத்தி கிராமங்கள் சமணத்துடன் தொடர்புடையவை.
மின்வாரியத்தில் பணியாற்றும் தீனதயாளன் அவர்கள், “எங்கள் ஊருக்கு வர வேண்டும்” என்று அன்பு அழைப்பு விடுத்திருந்தார். அதன் பேரில் இன்று வேப்பங்கரனைக்குப் பயணம்.
கிராமத்திற்கு முன்னதாகவே, வனப்பகுதி. அதனூடாக, நீண்டதூரம் பயணித்தோம்.
இதோ, சமவெளி கண்ணில் படுகிறது.
சமவெளி மட்டுமல்ல: சிதைவடைந்து நின்றிருக்கும், சிவ, விஷ்ணு கோயில்கள். கருங்கல் கட்டுமானங்கள். பின்னாட்களில் பிரித்தெடுத்து செங்கல்லில் கட்டி இருக்கின்றனர்.
அவையும் நிலைக்கவில்லை!
பிரித்தெடுக்கப்பட்ட கருங்கற்கள், சிற்பங்கள் இடம்பெற்ற கட்டுமானங்கள் வயல்வெளியில் ஆங்காங்கே சிதறிக் கிடக்கின்றன.
வைணவ ஆலயத்திற்கு எதிரே நீண்டுயர்ந்த விளக்குத் தூண், இதோ நான் நிற்கிறேனே! என்று நம்மை ஏக்கத்துடன் பார்க்கிறது.
கோயிலுக்கான குளம் புதர்களுக்கு இடையே தூர்ந்து கிடக்கிறது.
அந்த இடத்தைச் சுற்றி வரும் போது பார்த்தேன்: நிறைய பானை ஓடுகள், சில்லுகள். ஆயிரம் ஆண்டுகளுக்கு முன்பு மனிதர்கள் இங்கு வாழ்ந்ததற்கானத் தடயங்கள்.
கோயில்களை, அவற்றின் வரலாற்றை மீட்டெடுக்க வேண்டும் என்பதில் உள்ளூர்க்காரர்கள் மிகுந்த ஆர்வத்துடன் இருக்கிறார்கள்.
எங்களுக்காக இவ்வளவு தூரம் மெனக்கெட்டு வந்து இருக்கிறீர்கள் என, உணவு வழங்கி உபசரித்து மகிழ்ந்தனர் வேப்பங்கரனையின் இனியவர்கள்!
உணவு உபசரிப்பு எல்லாம் இத்தனை ஆண்டுகால நம் பயணத்தில் எங்கும் பார்க்காதது ! மிகவும் மகிழ்ச்சி!
திடீர் இட்லி, திடீர் சட்னி ஏற்பாடு செய்த, குணாபாய் அம்மையார் பாராட்டிற்கு உரியவர். “இந்த உபசரிப்பு தன் தாய் சொல்லிக் கொடுத்தது” என்கிறார். வாழ்த்துகள்!
பெரிய அளவிலான கோயில் பணிகளை எடுத்துச் செய்யும் நல்லுள்ளங்களின் கருணைப் பார்வை வேப்பங்கரனை மீது படர வேண்டும்...
திண்டிவனத்தில் இருந்து மெனக்கெட்டு என்னை அழைத்துச் சென்றும் புகைப்படங்கள் எடுத்தும் மிகவும் உதவிய நண்பர் Karthik Muniyappan அவர்கள் மிகவும் நன்றிக்கு உரியவர்!
