შალვა ამირანაშვილის სახელობის ხელოვნების სახელმწიფო მუზეუმი

29/04/2026

ბელა ბერძენიშვილის მცირე რეტროსპექტული გამოფენა

დიმიტრი შევარდნაძის სახელობის ეროვნული გალერეა 30 აპრილიდან უმასპინძლებს ბელა ბერძენიშვილის მცირე რეტროსპექტულ გამოფენას, სახელწოდებით: „მივიწყებული მხატვრები, რომლებმაც შექმნეს თბილისის დაუვიწყარი ადგილები“.

ბელა ბერძენიშვილის (1929-2005) მრავალმხრივი შემოქმედება - დაზგური მხატვრობა, ილუსტრაცია და მონუმენტური ხელოვნება - ქართული ხელოვნების უმნიშვნელოვანესი მონაპოვარია. საბჭოთა რეჟიმის პირობებში, როდესაც ფორმისა და შინაარსის ავთენტური კავშირი ხელოვნურად იყო გაწყვეტილი, მან შეძლო ეროვნული მხატვრული ფორმის ნამდვილი ჟღერადობის აღდგენა.

მხატვრის მიერ 1960-იან წლებში შექმნილი ნატურმორტები ქართული ეთნოგრაფიული კულტურის ამსახველია. ბელა ბერძენიშვილი ასევე ცნობილია სვანეთის პეიზაჟების სერიითა და ნაყოფიერი მოღვაწეობით წიგნის ილუსტრაციაში. მან გააფორმა ქართული ხალხური ზღაპრებისა და პოეზიის ნიმუშები, აგრეთვე „შუშანიკის წამების“ საიუბილეო გამოცემა (1976). მონუმენტური ხელოვნების გამორჩეულ ნიმუშად ითვლება მისი პანო - სასტუმრო „ივერიის“ კედლის მოხატულობა (1967).

საქართველოს დამსახურებული მხატვრის ნამუშევრები დაცულია საქართველოს ეროვნულ, ლიტერატურისა და ამბროლაურის მუზეუმებში, ისევე როგორც მსოფლიოს სხვადასხვა კერძო კოლექციაში.

გამოფენის ფარგლებში გაიმართება ბელა ბერძენიშვილის სრული შემოქმედების კატალოგის პრეზენტაცია. კატალოგის პროექტი განხორციელდა საქართველოს კულტურის სამინისტროს, „შემოქმედებითი საქართველოსა“ და „შემოქმედებითი თბილისის“ ფინანსური ხელშეწყობით კატალოგის შეძენა შესაძლებელი იქნება ეროვნული გალერეის მაღაზიაში.

გამოფენა გაგრძელდება ერთი თვის განმავლობაში.
მისამართი: რუსთაველის გამზ. №11

28/04/2026

ბუბა არაბული, დროისა და სივრცის მიჯნაზე

2026 წლის 30 აპრილს, 18:00 საათზე, დიმიტრი შევარდნაძის სახელობის ეროვნულ გალერეაში გაიხსნება ბუბა არაბულის პერსონალური გამოფენა დროისა და სივრცის მიჯნაზე.

1986-1990 წლებში სწავლობდა იაკობ ნიკოლაძის სახელობის სამხატვრო სასწავლებელში. 1996 წელს დაამთავრა თბილისის აპოლონ ქუთათელაძის სახელობის სახელმწიფო სამხატვრო აკადემიის, სახვითი ხელოვნების ფაკულტეტი, ფერწერის მიმართულებით.

ბუბა არაბული მხატვართა იმ თაობას მიეკუთვნება, რომლის შემოქმედებითი აქტივობა XXI საუკუნის დასაწყისს ემთხვევა და თანამედროვე ქართული ფერწერის ახალ ეტაპს იწყებს. ეს არის დრო, როდესაც მხატვარი სრულიად თავისუფალია იდეოლოგიური ჩარჩოებისგან და საკუთარ ხელოვნებას პერსონალურ გამოცდილებაზე, ინდივიდუალურ მსოფლხედვასა და შთაგონებაზე აგებს.

არაბულის ვიზუალური ენა იმ შუალედურ მდგომარეობას აღწერს, როდესაც ყოველდღიურობა შინაგან გამოცდილებად გარდაიქმნება. მხატვარი მაყურებელს თითქოს დროსა და სივრცეს შორის გამავალ, წარმოსახვით საზღვარზე ეპატიჟება, სადაც ემოცია ახალ სიხშირეს, ხოლო სიმბოლო განსხვავებულ მნიშვნელობას იძენს. მისი ფიგურები, ობიექტები და პეიზაჟები სწორხაზოვან ნარატივს არ გვთავაზობს. ისინი სემიოტიკური ნიშნებია, რომლებიც მეხსიერებას, გაურკვეველ მოლოდინსა და დაუზუსტებელ, თითქმის არაცნობიერ გამოცდილებას უკავშირდება.

მხატვრის ნამუშევრები ინახება სხვადასხვა ქვეყნის კერძო კოლექციებში - საქართველოში, გერმანიაში, საფრანგეთში, ესპანეთში, ლიტვაში, ბელგიაში, რუმინეთში, რუსეთსა და შეერთებულ შტატებში.
გამოფენა გრძელდება 2026 წლის 25 მაისამდე.

12/04/2026

საქართველოს ეროვნული მუზეუმი გილოცავთ აღდგომის ბრწყინვალე დღესასწაულს!

24/03/2026

23/03/2026

2026 წლის 25 მარტს, 18:00 საათზე, დიმიტრი შევარდნაძის სახელობის ეროვნულ გალერეაში გაიხსნება საქართველოს სახალხო მხატვრის, რუსთაველის პრემიის ლაურეატ თემო გოცაძის 85 წლისადმი მიძღვნილი გამოფენა, რომელიც საქართველოს კულტურის სამინისტროს ხელშეწყობითა და საქართველოს ეროვნული მუზეუმის მხარდაჭერით ხორციელდება.

ცნობილი მონუმენტალისტისთვის დამახასიათებელი მასშტაბური კომპოზიციების ნაცვლად, ექსპოზიციაზე წარმოდგენილი იქნება ცხოვრების ბოლო წლებში შექმნილი გრაფიკული ნამუშევრები საოჯახო კოლექციიდან. ისინი წარმოაჩენს გოცაძის შემოქმედებითი ხედვის კამერულ მხარეს, რომელიც იდეის ფორმირების, პლასტიკური აზროვნებისა და კომპოზიციური ძიებების პროცესს მხატვრისეული ორიგინალური ხელწერით გადმოსცემს.

ნაყოფიერ შემოქმედებით მოღვაწეობასთან ერთად თემო გოცაძე ათწლეულების განმავლობაში აქტიურ საზოგადოებრივ საქმიანობას ეწეოდა და ხელმძღვანელობდა კულტურის მთავარ ინსტიტუციებს საქართველოში: 1983-1995 წლებში იყო მხატვრის სახლის დირექტორი; 1988-2005 წლებში კი გახლდათ საქართველოს სამუზეუმო-საგამოფენო გაერთიანება “სურათების ეროვნული გალერეის გენერალური დირექტორი.

1980-იან წლებში თემო გოცაძის უშუალო ინიცირებითა და ხელმძღვანელობით შეიქმნა ფერწერის, გრაფიკისა და ქანდაკების შემოქმედებითი სახელოსნოები, სადაც უკვე აღიარებული ხელოვანი დიდხანს მუშაობდა. მისივე თაოსნობით შეგროვდა თანამედროვე ქართველ მხატვართა 25 000-ზე მეტი ნამუშევრის უდიდესი კოლექცია, რომელიც საფუძვლად უნდა დადებოდა თანამედროვე ქართული სახვითი ხელოვნების მუზეუმს. თუმცა, ამ იდეის განხორციელებას 90-იანი წლების რთულმა პოლიტიკურ-სოციალურმა პროცესებმა შეუშალა ხელი.

თემო გოცაძის ნამუშევრები დაცულია საქართველოს ეროვნული მუზეუმის შალვა ამირანაშვილის სახელობის ხელოვნების; ქართული სახვითი ხელოვნებისა და საქართველოს ხელოვნების სასახლე - კულტურის ისტორიის მუზეუმებში; ტრეტიაკოვის სახელმწიფო გალერეაში ( რუსეთი); დუსელდორფის თანამედროვე ხელოვნების, ზიმერლის ხელოვნების, კანადის თანამედროვე სახვითი ხელოვნების, მოსკოვის აღმოსავლეთის ხალხთა ხელოვნებისა და კალიფორნიის ფედერალურ მუზეუმებში, ასევე უცხოეთის (საფრანგეთის, იტალიის, დიდი ბრიტანეთის, აშშ-ის, მექსიკის, ირანის, თურქეთის, კანადის, რუსეთის, საქართველოსა და სხვა ქვეყნების) კერძო კოლექციებში.

გამოფენა გაგრძელდება 2026 წლის 26 აპრილამდე.

21/03/2026

Send a message to learn more

19/03/2026

საქართველოს ეროვნული მუზეუმი ღრმა მწუხარებას გამოთქვამს სრულიად საქართველოს კათოლიკოს პატრიარქის, მცხეთა-თბილისის მთავარეპისკოპოსისა და ცხუმ-აფხაზეთის მიტროპოლიტ ილია II-ის გარდაცვალების გამო.

ფასდაუდებელია მისი მრავალწლიანი მოღვაწეობა და წვლილი ქართული მართლმადიდებელი ეკლესიის სულიერსა და ფიზიკურ აღორძინებაში. საპატრიარქო ტახტის საჭეთმპყრობელმა, მრავალი დაბრკოლების მიუხედავად, შეძლო ერის გაერთიანება და ქართველ ხალხს, განურჩევლად რწმენისა, მისცა უანგარო სიყვარულის მაგალითი და ჩაუსახა იმედი მომავალი ურთულესი გზის გასავლელად.

წარუშლელია სიყვარულით, მადლიერებითა და ნდობით გამსჭვალული მისი დამოკიდებულება ეროვნული მუზეუმის მიმართ. მას ბევრჯერ აღუნიშნავს, რომ წარსულის კვლევა და ჩვენს საუნჯეზე ზრუნვა უმნიშვნელოვანესი მისიაა. იგი ხშირად იმოწმებდა კლიმენტი ალექსანდრიელის გამონათქვამს: ,,მარტოოდენ მორწმუნე ადამიანი არის მონა ღვთისა, ხოლო მორწმუნე და განათლებული მეგობარია ღვთისა“.

მუზეუმის თანამშრომლებს არასოდეს დაავიწყდებათ ილია II-ის ხშირი სტუმრობა მუზეუმში დაცული ანჩის ხელთუქმნელი ხატის დღესასწაულზე. იგი როგორც რიგითი ბერი და ერის სულიერი წინამძღოლი ყოველთვის ცდილობდა ხატის წინაშე პარაკლისის გადახდას და უფალს შესთხოვდა ერის სულიერ გაძლიერებას, ფიზიკურ გადარჩენასა და აღორძინებას.

საქართველოს ეროვნული მუზეუმი იზიარებს წმინდა სინოდის წევრების, საეკლესიო დასისა და სრულიად საქართველოს ტკივილს მძიმე დანაკარგის გამო.

05/02/2026

05/02/2026

2026 წლის 6 თებერვლიდან 7 მარტის ჩათვლით დ. შევარდნაძის სახელობის ეროვნულ გალერეაში გაიმართება ქართველი მხატვრის, მონუმენტური ფერწერის ერთ-ერთი გამორჩეული წარმომადგენლის — კოკი მახარაძის საიუბილეო გამოფენა. ეს არის ავტორის პირველი პერსონალური გამოფენა.
კოკი მახარაძე სამოღვაწეო ასპარეზზე 1950–60-იან წლებში გამოვიდა და სოცრეალიზმის ეპოქაში ჩამოაყალიბა საკუთარი, განსხვავებული სახვითი ენა — სიმბოლისტურ-მეტაფორული კომპოზიციებით დატვირთული, მკვეთრად ეროვნული თემატიკის ნამუშევრები.
აკადემიაში სწავლის პერიოდში (1943–1953) მისი შემოქმედებითი ძიებები უკავშირდებოდა ისტორიული ჟანრის და აკადემიური რეალისტური ფერწერის ტრადიციებს. იგი იყო აპოლონ ქუთათელაძის და უჩა ჯაფარიძის მოწაფე. ცალკე დგას მისი სოცრეალისტური ნამუშევრების სერია, რომელზეც 1960–70-იან წლებში მუშაობდა.
1980-იანი წლებიდან იცვლება მისი წერის მანერა — ჩნდება წითლისა და შავის მისტიკურ კოლორიტში გადაწყვეტილი ექსპრესია (ვენეციისა და ინდოეთის სერიები). ქართულ თემატიკაზე შექმნილ ნამუშევრებს ახასიათებს ფორმათა და ფიგურათა მძაფრი დინამიკა, ფერადოვანი ლაქებით გადმოცემული სიუჟეტის ემოციური გამძაფრება, ფონის აბსტრაგირება („ცეცხლითა და მახვილით“, „ამაღლება“, თბილისის ხედები).
გამოფენაზე წარმოდგენილი იქნება მისი ყველასათვის ცნობილი მონუმენტური ტილო „მიწა ქართული“, რომლის გვიანდელი ვერსია მრავალი წლის განმავლობაში ამშვენებდა ივანე ჯავახიშვილის სახელობის თბილისის სახელმწიფო უნივერსიტეტის ფოიეს. ასევე გამოიფინება 1970–80-იან წლებში შექმნილი სერიები და გრაფიკული ჩანახატები, რომელთა ნაწილი საზოგადოებას პირველად წარედგინება.

გამოფენის გახსნა 6 თებერვალს, 18:00 საათზე
დასწრება თავისუფალია
რუსთაველის გამზ. # 11

გამოფენა გაგრძელდება 7 მარტის ჩათვლით

29/01/2026

ოთარ სულავა/100
ეროვნული გალერეა საქართველოს დამსახურებული მხატვრის - ოთარ სულავას (1926-2000) საიუბილეო გამოფენას მასპინძლობს.

დიმიტრი შევარდნაძის სახელობის საქართველოს ეროვნულ გალერეაში ოთარ სულავას პერსონალური გამოფენა პირველად იმართება და მხატვრის შემოქმედების რეტროსპექტულ სურათს გთავაზობთ.
ოთარ სულავამ 1952 წელს დაამთავრა თბილისის სახელმწიფო სამხატვრო აკადემია. მისი პედაგოგები იყვნენ: მოსე თოიძე, ვალენტინ შერპილოვი, სერგო ქობულაძე, უჩა ჯაფარიძე. მხატვრის შემოქმედებითი ბიოგრაფია 5 ათეულ წელს მოიცავს. მან მრავალფეროვანი ძიებებით სავსე შემოქმედებითი გზა განვლო. მისი მხატვრული მემკვიდრეობა სტილურად თუ თემატურად უცნაურად განსხვავებულ ნამუშევრებს აერთიანებს. გამოფენაზე წარმოდგენილია მხატვრის 100-მდე ნამუშევარი ხელოვნების სახელმწიფო მუზეუმის, ეროვნული გალერეისა და ოჯახის კოლექციებიდან.
ოთარ სულავას მრავალფეროვანი შემოქმედების სამეტყველო ენა ფერწერაა, რომლის ამოუწურავი გამომსახველობითი შესაძლებლობების ძიებას მან მთელი თავისი ცხოვრება მიუძღვნა და დაგვიტოვა მრავალმხრივ ღირებული მხატვრული მემკვიდრეობა.

გამოფენის გახსნა- 5 თებერვალი, 18.00 საათზე
დასწრება თავისუფალია
რუსთაველის გამზ. # 11

15/12/2025

დიმიტრი შევარდნაძის სახელობის ეროვნული გალერეა 19 დეკემბრიდან 2026 წლის 1 თებერვლის ჩათვლით მხატვარ ვლადიმერ (ვოვა) კანდელაკის რეტროსპექტულ გამოფენას უმასპინძლებს.

ვლადიმერ კანდელაკი 1970-იანი წლების ქართველი მხატვრების თაობის გამორჩეული წარმომადგენელია. მისი შემოქმედება თემატური და სტილისტური მრავალფეროვნებით გამოირჩევა. რეტროსპექტული ხასიათის გამოფენაზე წარმოდგენილი იქნება მისი მოღვაწეობის თითქმის ყველა პერიოდი: როგორც ნონკონფორმისტული ხასიათის ასამბლაჟები და კოლაჟები, ასევე სიურეალისტური კომპოზიციები, ეროვნულ-ისტორიული სიუჟეტები - საქართველოს მთის ეპოსი და თბილისური მოტივები.

ვლადიმერ კანდელაკის როგორც ნონკონფორმისტი მხატვრის ჩამოყალიბება XX საუკუნის 70-იანი წლებიდან იწყება. სარკაზმითა და იუმორით აღსავსე ობიექტებში ხელოვანი ასახავს საბჭოთა რეალობას კომიკურობამდე მისული პროპაგანდისტული ნარატივით.

ვლადიმერ კანდელაკი დაიბადა ქ.თბილისში 1943 წელს. 1971 წელს დაამთავრა თბილისის სამხატვრო აკადემია; 1969 -1990 წლებში იყო სსრკ მხატვართა კავშირის წევრი; 1990 წელს მას მიენიჭა საქართველოს დამსახურებული მხატვრის წოდება; 1993 წელს გახდა იუნესკოს ხელოვანთა საერთაშორისო ფედერაციის წევრი; 1999 წელს - თბილისის სამხატვრო აკადემიის დამსახურებული პროფესორი; 2003 წელს მიანიჭეს თბილისის საპატიო მოქალაქის წოდება. 1970-იანი წლებიდან მხატვარი აქტიურად იფინებოდა საქართველოს მუზეუმებსა და კერძო გალერეებში, ხოლო 1990-იანი წლებიდან მისი პერსონალური გამოფენები მოეწყო აშშ -ში (ვაშინგტონი, ფილადელფია, ატლანტა, ნიუ-იორკი), პოლონეთში, ფინეთსა და რუსეთში.

მისი ნამუშევრები დაცულია საქართველოსა და საზღვარგარეთის მუზეუმებში: საქართველოს ეროვნული მუზეუმში, ქართული სახვითი ხელოვნების მუზეუმში (თბილისი); ზიმერლის ხელოვნების მუზეუმში (ნიუ ჯერსი, აშშ); კრემონას ფონდში (მერილენდი, აშშ); ტრეტიაკოვის გალერეასა და აღმოსავლეთის ხალხთა ხელოვნების მუზეუმში (მოსკოვი,რუსეთი); აგრეთვე საბჭოთა და ნონკონფორმისტული ხელოვნების ცნობილი მკვლევარისა და კოლექციონერ ნორტონ დოჯისა და სხვათა კერძო კოლექციებში.

გამოფენის გახსნა - 19 დეკემბერს, 18.00 საათზე.